Keshe «Qajymuqan» fılmi úshin qýandyq. Italııada úzdik dep tanylypty. Mádenıet jáne aqparat mınıstrligi men Ulttyq kınony qoldaý memlekettik ortalyǵy túsirgen týyndy Italııada ótken XXIX halyqaralyq «Ipaaf – Apoxiomeno» kınofestıvalinde joǵary baǵalanypty.
Kınotýyndy festıvaldiń basty marapattaryn ıelenip kelipti. Atap aıtsaq, «Úzdik fılm», «Eń úzdik er adam róli» (Erbol Tólepbergen), «Úzdik rejıssýra» (Qanaǵat Mustafın), «Úzdik ssenarıı» (Qanaǵat Mustafın, Janat Qasabekov) atalymdaryna laıyq dep tanylǵan.
Rejısseri Qanaǵat Mustafın tarıhı fılm ssenarııine 2012 jyly kiriskenin aıtady. 2020 jyly túsirilimin bastap, on jyldan astam ýaqyt zertteý júrgizgen. Sonyń nátıjesinde týyndy ótken jyly úlken ekranǵa usynylyp, prokatqa shyqty.
Qajymuqan Muńaıtpasuly – fransýz kúresinen álem chempıony atanǵan tuńǵysh qazaq. Ol álemdik, óńirlik, reseılik, keıin Búkilodaqtyq sýper aýyr salmaqtaǵy klassıkalyq kúres chempıonattarynyń birneshe dúrkin jeńimpazy atandy. Balýan sporttyq mansabynda elýge jýyq medal men marapatqa ıe bolyp, ult maqtanyshyna aınaldy.
«Ipaaf-Apoxiomeno» festıvali 30 jylǵa jýyq uıymdastyrylyp keledi. Italııada ótetin bedeldi halyqaralyq kınofestıval jyl saıyn kıno, óner jáne mádenıet salasyndaǵy úzdik týyndylardy marapattaıdy. Ásirese áleýmettik mańyzy bar taqyryptardy qozǵaıtyn, kórkemdik deńgeıi joǵary jáne mádenı damýǵa yqpal etetin shyǵarmalarǵa basa nazar aýdarady. Ár jyldary bul festıvalde álemniń túkpir-túkpirinen kelgen kórnekti óner qaıratkerleri jeńimpaz atandy.