Búgin, 9 shilde kúni elimizde sý sharýashylyǵy qyzmetkerleriniń kásibı merekesi atalyp ótedi. Sý resýrstary jáne ırrıgasııa mınıstrligi qurylǵan sátten bastap sý salasy mamandarynyń mártebesin arttyrýǵa erekshe nazar aýdaryp keledi, dep habarlaıdy Egemen.kz.
Aıta keteıik, «Tabıǵı monopolııalar týraly» zańǵa túzetýler ázirlenip, qabyldandy. Bul bıylǵy 1 qyrkúıekten bastap sý salasyndaǵy 25 myńnan astam qyzmetkerdiń eńbekaqysyn elektr jáne jylý energetıkasy salasynyń mamandary deńgeıine deıin kóterýge múmkindik beredi.
Sondaı-aq jaqyn arada «Qazsýshar» RMK-nyń maýsymdyq 435 qyzmetkeri turaqty jumyspen qamtamasyz etiledi.
Sý salasynda eńbek etetin mamandardyń kásibı biliktiligin arttyrýǵa erekshe kóńil bólinip keledi. Byltyr «Qazsýshar» RMK-nyń 500-den astam qyzmetkeri mamandandyrylǵan ortalyqtarda oqýdan ótken. Mınıstrlik bıyl bul kórsetkishti eki esege arttyrýdy kózdep otyr.
Sonymen qatar Qytaımen jasalǵan kelisimder aıasynda qazaqstandyq sý mamandary kórshiles elde biliktilik arttyrý kýrstarynan ótip jatyr. Qazirgi ýaqytta 60 adam oqýdan ótken. Jyl sońyna deıin Qytaıda taǵy 60 maman bilimin jetildiredi. Barlyq shyǵyndy Qytaı tarapy óz moınyna alǵan.
«Qazaqstan Respýblıkasynyń memlekettik nagradalary týraly» zańǵa tolyqtyrýlar engizildi. Endi sý sharýashylyǵyn damytýǵa eleýli úles qosqan mamandarǵa memlekettik nagrada – «Qazaqstannyń sý sharýashylyǵy salasynyń eńbek sińirgen qaıratkeri» ataǵy beriledi.
«Áriptesterimdi Sý sharýashylyǵy qyzmetkerleri kúnimen shyn júrekten quttyqtaımyn! Elimizdiń sý qaýipsizdigin qamtamasyz etý jolynda sińirip jatqan tabandy ári janqııar eńbekterińiz erekshe qurmet pen sheksiz alǵysqa laıyq. Sý sharýashylyǵy salasynyń bolashaǵy jumysshylardyń qajyrly eńbegimen qurylyp keledi. Eldi mekender, egistik alqaptary men ónerkásip nysandary tirshilik nárimen qamtamasyz etilip otyr. Osy merekede sizderge jáne jaqyndaryńyzǵa densaýlyq, tabys, molshylyq, jarqyn bolashaq jáne ashyq aspan tileımin!», dedi Sý resýrstary jáne ırrıgasııa mınıstri Nurjan Nurjigitov.