Premer-mınıstr Oljas Bektenov Manjerok qalasynda (Altaı Respýblıkasy) ótken birinshi Halyqaralyq ekologııalyq konferensııada sóz sóıledi, dep jazady Egemen.kz.
Konferensııada Oljas Bektenov Prezıdent tapsyrmasymen júzege asyp jatqan «Taza Qazaqstan» baǵdarlamasyna toqtaldy. Ekologııalyq aksııanyń tabıǵatqa, týǵan jerge uqypty qaraý mádenıetin qalyptastyrýdaǵy mańyzdylyǵyn atady.
Sondaı-aq, Úkimettiń ekologııalyq zańnamany jańǵyrtýda, tabıǵat qorǵaý salasyna ozyq tehnologııalardy engizýde, ekologııalyq baqylaýdy sıfrlandyryp jatqanyna nazar aýdardy. Bıoalýantúrlilikti qorǵaý qory qurylýda, erekshe qorǵalatyn aýmaqtar jelisi damytylýda, toǵaı buǵysy, qulan, arqar, qaraquıryq jáne qar barysy sııaqty sırek kezdesetin jáne joıylyp bara jatqan janýarlar túrleriniń popýlıasııasy qalpyna keltirilýde. Turan jolbarysy men Prjevalskıı jylqysyn reıntrodýksııalaý jumystary da aıtyldy.
Oljas Bektenov óz sózinde Kaspıı mańy elderin Kaspııdiń taıazdanýyna qarsy kúreste yntymaqtastyqqa shaqyrdy. El Úkimetiniń basshysy Kaspıı teńiziniń taıazdaný problemasyn aımaqtyń negizgi syn-qaterleriniń biri retinde atap ótti.
Kaspıı teńizi deńgeıiniń tómendeýine nazar aýdaryp, Kaspıı mańy memleketteri arasyndaǵy aımaqtyq ózara is-qımyldy jandandyrý qajettigin aıtty. «2000-shy jyldardyń basynan beri Kaspıı teńizi deńgeıiniń tómendeý úrdisi baıqalady. Osy jáne ózge de problemalardy zertteý úshin Kaspıı teńizi Qazaq ǵylymı-zertteý ınstıtýty quryldy. Ǵalymdardyń boljamdary kóńil kónshitpeıdi. Osynaý biregeı sý aıdynyn saqtap qalý úshin barlyq Kaspıı mańy memleketteriniń batyl úılestirilgen is-qımyly qajet», dedi Premer-mınıstr. Sý taqyrybyna qatysty sóılegen sózinde Oljas Bektenov Aral mańyndaǵy jaǵdaıǵa da nazar aýdardy. Búginde Qazaqstan Halyqaralyq Araldy qutqarý qoryn basqarady. Elimizde ony qalpyna keltirý jumystary júrgizilýde, Kókaral bógeti nyǵaıtylýda, Syrdarııa saǵasy qaıta qalpyna keltirilýde, balyq salasyn qoldaý jáne burynǵy teńizdiń keýip qalǵan túbin kógaldandyrý boıynsha jobalar iske asyrylyp jatyr. Premer-mınıstr, sondaı-aq, muzdyqtardy saqtaýǵa baǵyttalǵan jumystardyń da mańyzdylyǵyn atap ótti. Sarapshylardyń boljamynsha, 2100 jylǵa qaraı Ortalyq Azııa muzdyqtarynyń kólemi aıtarlyqtaı kishireıedi. Osyǵan baılanysty Qazaqstan Prezıdentiniń bastamasymen Er-Rııad sammıtinde muzdyqtardy zertteý jáne qorǵaý boıynsha kúsh-jigerdi biriktiretin «Sý munaralary seriktestigin» qurý usynyldy. Almatyda IýNESKO qamqorlyǵymen qurylyp, óńirlik zertteýlerdiń jetekshi platformasyna aınalǵan Ortalyq Azııalyq óńirlik glıasıologııalyq ortalyq jumys istep tur. Bul rette Qazaqstannyń sý qoımalaryn retteýden bastap sýdy esepke alýdy avtomattandyrýǵa deıingi birlesken gıdrotehnıkalyq jobalardy iske asyrýǵa daıyn ekendigi atap ótildi. Premer-mınıstr forým ótip jatqan orynnyń sımvoldyq mánine toqtalyp, Altaı ólkesi - túrki órkenıetiniń besigi, ári mádenı-gýmanıtarlyq ózara áriptestiktiń mańyzdy elementi ekenin atap ótti.
Plenarlyq otyrysqa Reseı Federasııasy Úkimetiniń tóraǵasy Mıhaıl Mıshýstın, Armenııa Premer-mınıstri Nıkol Pashınıan, Belarýs Premer-mınıstri Aleksandr Týrchın, Qyrǵyzstan Premer-mınıstri Adylbek Kasymalıev, Tájikstan Premer-mınıstri Kohır Rasýlzoda, О́zbekstan Premer-mınıstri Abdýlla Arıpov, sondaı-aq Túrikmenstan Mınıstrler kabıneti tóraǵasynyń orynbasary Nokergýly Atagýlyev qatysty. Jıynda Kaspııdiń taıazdanýy, muzdyqtardyń erýi jáne bıoalýantúrlilikti saqtaý máselelerimen qatar qorshaǵan ortany qorǵaý salasynda zamanaýı tehnologııalardy qoldaný, sý resýrstaryn basqarýǵa ınnovasııalyq sheshimderdi engizý jáne transshekaralyq ekotýrızmdi damytý jaıy talqylandy.