Shymkenttegi qylmystyq ister jónindegi mamandandyrylǵan aýdanaralyq sotta qala ákiminiń orynbasary Rýslan Berdenovke qastandyq jasaý isi boıynsha aldyn ala tyńdaý bastaldy, dep habarlaıdy Egemen.kz.
Buǵan deıin habarlanǵandaı, sotqa QR Qylmystyq kodeksiniń 24-baby 3-bóligi («Qylmys jasaýǵa oqtalý») jáne 99-baby 1-bóligi («Adam óltirýge oqtalý») boıynsha azamat J.-ǵa qatysty qylmystyq is túsken.
Bul is boıynsha kúdikti retinde Ernar Jıenbaı tanylyp otyr. Aldyn ala tyńdaý ashyq rejımde ótip jatyr. Alaıda sýdıa Abınur Qarabaev aıyptalýshynyń bet-júzin túsirýge tyıym salǵanyn málim qyldy: «Taraptardyń pikirin eskere otyryp, aıyptalýshyny túsirýge tyıym salynady», dedi sýdıa.
Eske salaıyq, bıyl 21 sáýirde keshki ýaqytta Shymkent qalasy ákimdigi ǵımaratynyń mańynda qala ákiminiń orynbasary Rýslan Berdenovke oq atylǵan. Sheneýnik jaraqat alyp, aýrýhanaǵa jetkizilgen. Kúdikti sol mezette ustalǵan.
Mamyr aıynda Rýslan Berdenov aýrýhanadan jazba men fotosýretter jarııalap, bul oqıǵa ózine, otbasyna jáne jaqyndaryna aýyr soqqy bolǵanyn, alaıda halyqtyń qoldaýy oǵan kúsh bergenin aıtyp, janashyr jandarǵa alǵysyn bildirgeni jáne aıaqqa turyp kele jatqanyn aıtqany málim.
Oǵan úsh ret oq atylǵany keıinnen belgili boldy. Onyń júrgizýshisi shabýyldaýshyny ustaýǵa kómektesken.
Oqıǵadan keıin jelide túrli nusqalar tarala bastady.