Qazaqstan halqy Assambleıasy Aqtaý qalasynda «QHA-ǵa 30 jyl: birlik pen kelisim» atty respýblıkalyq etnomedıatorlar forýmynda ulttar tatýlyǵyn saqtaý, el ishinde iritki týǵyzbaý, onyń aldyn alý turǵysyndaǵy atqarǵan jumystaryn ortaǵa salyp, aldaǵy josparlaryn talqylady.
Forým Qazaqstan halqy Assambleıasynyń «Eldesý jáne tatýlasý» jobasy aıasynda 28 shilde men 8 tamyz aralyǵynda ótip jatqan etnomedıasııaǵa arnalǵan aqparattyq-aǵartýshylyq marafonnyń basty basqosýy sanalady. Marafon baǵdarlamasyna saı kóshpeli trenıngter, dóńgelek ústelder, podkasttar men etnomedıasııaǵa arnalǵan avtorlyq arnaıy kýrstyń tanystyrylymdary ótkiziledi.
Forýmǵa Mańǵystaý oblysynyń ákimi N.Qılybaı, Prezıdent ákimshiligi QHA hatshylyǵynyń meńgerýshisi M.Ázilhanov, sondaı-aq respýblıkalyq, óńirlik etnomedıasııa ortalyqtarynyń jetekshileri, elimizdiń ár óńirinen kelgen delegattar, etnomedıatorlar, aqsaqaldar men analar keńesiniń músheleri, úkimettik emes uıym ókilderi men máslıhat depýtattary, jergilikti memlekettik organ ókilderi qatysty.
Qazaqstan halqy Assambleıasynyń HHHIV sessııasynda Prezıdent Q.Toqaev: «Qazaqstan Respýblıkasynyń Mádenıet jáne aqparat, Ishki ister, Ádilet mınıstrlikteri múddeli memlekettik organdarmen, Astana, Almaty, Shymkent qalalarynyń, oblystardyń ákimderimen birlesip, Qazaqstan halqy Assambleıasynyń etnomedıasııa salasyndaǵy jumysyna jan-jaqty qoldaý kórsetsin, «Eldesý jáne tatýlasý» jobasynyń aýqymyn keńeıtsin», dep tapsyrma bergen bolatyn. Sondaı-aq Memleket basshysy: «Etnosaralyq túsinispeýshilikterdiń aldyn alýda mańyzdy ról atqaratyn QHA-nyń etnomedıasııa ınstıtýtyna toqtalǵym keledi. Keıingi ýaqytta Assambleıa qyzmetindegi sarapshylyq quramnyń sapasy jańa deńgeıge kóterildi», dep atap ótti.
«Memleket basshysy Qasym-Jomart Toqaevtyń BUU Bas hatshysy Antonıý Gýterrıshpen kezdesýinde Bas hatshy Qazaqstandaǵy etnosaralyq tatýlyq pen qoǵamdyq aýyzbirshilikke joǵary baǵa berdi. Biz bir-birimizge qoldaý kórsetip, ortaq maqsatqa jumylsaq qana óńirimizdiń, elimizdiń áleýetin arttyra alamyz. Aýyzbirshilik pen ózara túsinistik bar jerde ǵana nátıje de, damý da bolady. Sondyqtan yntymaǵymyzdy bekemdep, ony barynsha damytýymyz kerek», dedi Mańǵystaý oblysynyń ákimi N.Qılybaı.
Prezıdent ákimshiligi QHA hatshylyǵynyń meńgerýshisi M.Ázilhanov ultaralyq tatýlyqty saqtaý, qazirgi qoǵamdaǵy kezdesetin keıbir máseleler men olardyń aldyn alý, atqarylǵan jumystar men aldaǵy josparlar týraly keńinen baıandady. Mańǵystaý oblystyq máslıhatynyń hatshysy, Qazaqstan halqy Assambleıasynyń óńirlik etnomedıasııa keńesiniń tóraǵasy, forým moderatory J.Mataev memleket damýyndaǵy etnomedıasııanyń mańyzyna, jergilikti deńgeıde atqarylǵan birqatar jumystarǵa toqtaldy.
Prezıdent janyndaǵy Memlekettik basqarý akademııasynyń vıse-rektory Á.Masalımovanyń «QHA etnomedıasııa ınstıtýtyn damytýdaǵy memlekettik basqarý akademııasy» taqyrybyndaǵy, Mádenıet jáne aqparat mınıstrligi Azamattyq qoǵam isteri komıteti tóraǵasynyń orynbasary J.Áljanovanyń «Medıasııany damytýdyń negizgi tásilderi» taqyrybyndaǵy, ózge de qatysýshylardyń mańyzdy baıandamalary tyńdalyp, óńirlerdegi etnomedıasııa ınstıtýtynyń damý tájirıbesi, etnosaralyq qatynastardy retteýdegi tıimdi ádister men praktıkalyq keıster, etnomedıatorlardyń kásibı daıarlyǵy men oqytý baǵdarlamalarynyń róli sóz boldy. Qatysýshylar etnosaralyq janjaldardyń aldyn alý algorıtmderi, qoǵammen syndarly ózara is-qımyl jasaý joldary, halyqaralyq tájirıbeler, elimizde medıasııany damytýǵa arnalǵan negizgi tásilder týraly pikir almasty.
Elimizdiń ár óńirinde forým ótkizýdi dástúrge aınaldyrǵan assambleıalyqtardyń bul Mańǵystaýda ekinshi ret basqosýy. Sol turǵyda bul baǵytta Mańǵystaý oblysynda atqarylǵan jumystar barysy tanystyryldy. Toqtalar bolsaq, óńirde etnomedıasııa baǵytynda júzege asyp jatqan jobanyń biri – «Assambleıa. Parlament. Máslıhat» jobasy.
– Joba sheńberinde Mańǵystaý oblystyq máslıhaty Qazaqstan halqy Assambleıasymen tyǵyz baılanysta jumys júrgizip jatyr. Atalǵan joba aıasynda oblys, aýdan, qala depýtattarynan QHA-nyń depýtattyq toby qurylyp, atalǵan toptyń jumys josparyna sáıkes etnomedıatorlarmen birlesken qabyldaý júrgizilip keledi. Bıyl Aqtaý qalasynyń túrki áleminiń mádenı astanasy bolýyna oraı, Mańǵystaý oblysynyń etnomedıasııasyn damytý, sheteldegi áriptestermen tájirıbe almasý jumystary josparlandy. Almaty qala- synda Ulttyq qaýipsizdik komıteti Akademııasy bazasynda az ýaqyt aralyǵynda 6 etnomedıator óz biliktilikterin shyńdady. Sondaı-aq etnomedıatorlardyń biliktiligin arttyrý maqsatynda 30 etnomedıator jalpy jáne arnaıy kýrstardan ótip, «Parasat» medıasııa jáne quqyq ortalyǵynyń sertıfıkatyn aldy, – dedi Mańǵystaý oblystyq máslıhatynyń hatshysy, Qazaqstan halqy Assambleıasynyń óńirlik etnomedıasııa keńesiniń tóraǵasy J.Mataev.
«Eldesý jáne tatýlasý» jobasy aıasynda jergilikti quqyq qorǵaý organdarymen tyǵyz baılanysta jumys júrgizý de durys jolǵa qoıylǵan. Forým barysynda etnomedıasııany beıbit dıalogtiń tıimdi quraly retinde damytý, medıatorlardy daıarlaý, quqyqtyq aǵartý, vedomstvoaralyq yntymaqtastyqty jetildirý máseleleri qarastyrylyp, «Jalpy medıasııa kýrsy» boıynsha sertıfıkattalǵan oqytý nátıjeleri men «Etnosaralyq saladaǵy qaqtyǵystardyń aldyn alý jáne olardy retteý jónindegi medıasııa» (etnomedıasııa) taqyrybyndaǵy arnaıy kýrstyń tusaýkeseri, óńirlik tájirıbeler men sarapshylardyń baıandamalary qamtylatyn paneldik sessııa uıymdastyryldy.
Forýmda etnosaralyq tatýlyq pen qoǵamdyq kelisimdi nyǵaıtýǵa qosqan úlesi úshin birqatar azamat Qazaqstan halqy Assambleıasynyń arnaıy marapattaryna ıe boldy.
Assambleıanyń jumysy, etnomedıatorlardyń deńgeıi jınalystar men marapattar kóleminen emes, el arasyndaǵy alaýyzdyqty aýyzdyqtaýynan, ulttyq ar-namysqa til tıgizýshilerdi tártipke salýynan, kerek dese zańǵa saı tıisti jazasyn berýden kórinedi. Sondyqtan atalǵan uıymnyń belsendiligi men bedeli árdaıym syn satysynda turady.
Mańǵystaý oblysy