Sharýalardyń eńbegi esh ketkeni me?

Shyny kerek, Talas aýda­ny, Bostandyq aýylynyń baqsha ónimi óńir úshin kádim­gideı brendke aınal­ǵa­­ny belgili. Dámi til úıiretin Bostandyqtyń qarbyzyna qyzyqpaıtyndar kemde-kem edi. Alaıda osy jyl­dyń kókteminde ekken shyryndy jemis sharýalardy shyǵynǵa ushyratatyn túri bar. О́ıtkeni judyryq­taı jumylyp is qylǵan dıqan­dardyń ónimi shilde ortasynda ótýi qıyndaı túsken.

«Kóktem mezgilinde iske bar ynta-shyntańmen kirisesiń. Alaıda ekken qarbyzyń ót­peı jatsa, eńbegiń esh ketpeı qaıtedi? Bostan­dyq pen Ta­lapty aýylynda 1-2 gektardan qarbyz egetin otba­sy barshylyq. Jaýapty mamandar bizge nazar aýdarsa jón bolar edi», deıdi Bostan­dyq aýyly­nyń turǵyny Qambarbek Tursynbekov.

Mańdaı terin syǵymdaǵan sharýalar 2 myń tonnaǵa jýyq ónim alǵanymen, onyń az ǵana bóligin satyp úlgergen. Q.Tursynbekovtiń aıtýynsha, buǵan deıin ónimdi ózge elderge de saýdalapty. Al qazir shetelge shyǵaratyn múmkin­dik joqtyń qasy. Dıqandar­dyń janaıqaıyn estigen jaýapty basqarmadaǵylar olardyń saýda jelilerimen kelisim jasasyp, taýardy qaı kezde de sata alatynyn alǵa tartyp otyr.

«Kásipkerler ónimin tikeleı jetkizse, saýda jelilerimen shart jasasyp, baǵasyn belgilep sata alady. Olar osy baǵytta jumys isteýge daıyn. Bazardan eshkimniń qýyp shyqpasy anyq. О́z kólikterimen kelip, ózderi qoıǵan baǵamen saýda jasaýǵa bolady», deıdi oblys ákimdigi kásipkerlik jáne ındýstrıaldy-ınnovasııalyq damytý basqarmasynyń bólim basshysy Baqytjan Oryntaev.

Bir anyǵy, sharýalar osy jylǵy ónimdi ótkizýdi ózderi qolǵa alǵany abzal bolyp tur. Alaıda alqapta jaıqal­ǵan qarbyzdyń edáýir bóligi jeý­ge jaramsyz bolyp qal­ǵany belgili. Áıtse de, ja­ýapty basqarmadaǵylar keler jyly sharýalardy kelisim­shart­qa otyrýǵa úgittep otyr. Olar aldyn ala ótinish berse, áleýmettik bazarlardan tegin oryn qarastyrylmaq.

Jambyl oblysy,

Talas aýdany