Ádebı kesh «Uly halyqtyń – uly Abaıy» atty 10 kúndik merekelik sharalar aıasynda «Abaı – máńgilik ǵumyr» taqyrybynda uıymdastyryldy, dep habarlaıdy Egemen.kz.
Is-sharanyń negizgi maqsaty – aqynnyń baı rýhanı murasyn dáripteý, jas urpaqtyń boıyna ulttyq qundylyqtar men mádenıetti sińirý jáne Abaı shyǵarmashylyǵyn tyń qyrynan tanytý boldy.
Kesh barysynda qonaqtarǵa Abaıdyń óleńderi oqylyp, ánderi oryndaldy. Aqyn ómiri men shyǵarmashylyǵyna qatysty derekter usynylyp, arnaıy beıneınstallıasııa men fotokórme kórermen nazaryna usynyldy. Ashyq mıkrofon formatyndaǵy shyǵarmashylyq pikir almasý alańy qatysýshylarǵa óz oı-pikirlerin ortaǵa salýǵa múmkindik berdi.
Poezııa keshine jergilikti aqyn-jazýshylar, ónerpazdar, stýdentter jáne qala turǵyndary qatysty. Jas oryndaýshylardyń mýzykalyq jáne poetıkalyq qoıylymdary kórermenderge erekshe áser qaldyrdy.
Is-shara sońynda qatysýshylar Abaı murasyn ulyqtaý – árbir azamattyń paryzy ekenin atap ótip, onyń shyǵarmalaryn keńinen nasıhattaýǵa shaqyrdy.