Jyl saıyn jańa oqý jyly qarsańynda elimizde «Mektepke jol» aksııasy ótedi. Bilim álemine bettegen oqýshynyń muqtajy bolsa, onyń kem-ketigin toltyrýǵa memleket te, jeke adamdar da atsalysady. Bul ıgi is Aqjaıyq óńirinde de uıymshyldyqpen ótip jatyr.
Atalǵan aksııanyń maqsaty – az qamtylǵan jáne kópbalaly otbasylardan shyqqan oqýshylarǵa, jetim balalar men ata-anasynyń qamqorlyǵynsyz qalǵan balalarǵa oqý jylynyń bastalýyna daıyndyq kezinde kómek kórsetý. Negizi Úkimettiń 2008 jylǵy 25 qańtardaǵy №64 qaýlysy negizinde jergilikti bıýdjet esebinen qurylǵan Jalpyǵa birdeı bilim berý qory bar. Osy qordan memlekettik ataýly áleýmettik kómek alýǵa quqyǵy bar otbasy balalaryna, memlekettik ataýly áleýmettik kómek almaıtyn, biraq tabysy tómen otbasy balalaryna, qamqorshy qolynda turatyn jetim balalarǵa jáne ata-ana qamqorlyǵynsyz qalǵan balalarǵa, tótenshe jaǵdaı saldarynan shuǵyl járdemdi talap etetin otbasy balalaryna jáne bilim berý uıymynyń alqaly basqarý organy aıqyndaǵan ózge de sanattarǵa qarjylaı kómek beriledi.
– Bıyl Batys Qazaqstan oblysy boıynsha jalpyǵa birdeı bilim berý qorynan oqýshylarǵa keńse taýarlaryn, mektep formasyn, sporttyq kıim, aıaq kıim, t.b. zattardy satyp alýǵa 434,0 mln teńge qarajat qarastyryldy. Qazirge deıin 1991 oqýshyǵa jalpy somasy 92,0 mln teńge kólemindegi qarajat ata-analardyń kart-shottaryna aýdaryldy. Iаǵnı ár oqýshyǵa 46 228 teńge kóleminde aqshalaı kómek kórsetildi, – deıdi Oblystyq bilim basqarmasy basshysynyń mindetin ýaqytsha atqarýshy Aqjarqyn Temirhanova.
Byltyr Batys Qazaqstan oblysy sý tasqynynan kóp zardap shekti. Biraq 2024 jyly «Mektepke jol» aksııasy aıasynda sý tasqynynan zardap shekken otbasy balalaryna kómek te kóp bolypty. Máselen, «Jelken foundation» qoǵamdyq qory, «Freedom Holding Corp» kompanııasy járdemge kıim jáne oqý quraldaryn bergen. «Igilik-Mereı» qoǵamdyq qory Báıterek aýdany bilim berý bóliminiń «Chebotarev «mektep-bóbekjaı-balabaqsha» keshenine» oqýshylardy tasymaldaý úshin «PAZ» avtobýsyn syılaǵan.
Bilim basqarmasy óńirdegi barlyq aýqatty azamatty, kásipkerdi, sharýa qojalyǵy ıelerin osy bir qaıyrymdylyq is-sharasyna atsalysýǵa shaqyryp, úndeý jarııalady. Bul ıgi bastamany birden qoldap ketkender de bar.
– Biz «Mektepke jol» aksııasyna jyl saıyn qatysamyz. Bıyl da Terekti aýdanynyń Saryómir jáne Ańqaty aýyldyq okrýgine, Syrym aýdanynyń Toǵanas jáne Alǵabas aýyldyq okrýgine árqaısysyna 150 myń teńge, barlyǵy 600 myń teńge qarajat berip otyrmyz. Atalǵan ár aýyldyń az qamtylǵan 5 oqýshysy 30 myń teńgege mektepke qajet zattaryn alady. Bul oqýshylardy aýyl ákimdigi ózderi tańdaıdy, – deıdi «Dádem ata-Jumaǵazy haziret» qorynyń basshysy Ǵarıfolla Janbozov.
«Mektepke jol» aksııasy qyrkúıek aıynyń sońyna deıin jalǵasady.
Batys Qazaqstan oblysy