Mańǵystaý oblysy ákimdiginiń qoldaýymen Qazaqstannyń Stambýldaǵy bas konsýldyǵynyń uıymdastyrýymen densaýlyq saqtaý salasyndaǵy yntymaqtastyqty keńeıtý jáne halyqaralyq áriptestikti odan ári nyǵaıtý maqsatynda mańǵystaýlyq dárigerler Túrkııanyń jetekshi medısınalyq mekemelerinde taǵylymdamadan ótti, dep jazady Egemen.kz.
Atalǵan baǵdarlama sheńberinde Mańǵystaý oblysynyń hırýrg-onkolog, otolarıngolog dárigerlerinen quralǵan delegasııa Stambýl qalasyndaǵy «Hisar Hospital» medısına ortalyǵynda jáne «Medicana Health Group» klınıkasynda kásibı bilimin jetildirip, tájirıbe almasty.
Dárigerler quramynda Mańǵystaý oblystyq onkologııa ortalyǵynyń sáýlelik-terapııa bóliminiń dárigeri, onkolog Gúlzıra Qudabaeva, hırýrg-onkolog dáriger Nurpeıis Jaqsybaı, Beıneý kópbeıindi ortalyq aýdandyq aýrýhanasynyń onkolog dárigeri Nurbolat Izbergenov, Túpqaraǵan ortalyq aýdandyq aýrýhanasynyń onkolog dárigeri Aıagóz Moldabekova, Mańǵystaý oblystyq kópbeıindi aýrýhanasynyń hırýrg-dárigeri Saǵat Bitimov, otolarıngolog-dáriger Dýlat Maıemer, ýrolog-dáriger Qaırat Nuralıev jáne №2 Aqtaý qalalyq emhanasynyń hırýrg-dárigeri Aızada Qosbosınova bar.
Taǵylymdama aıasynda mamandar zamanaýı tehnologııalardy qoldaný, kúrdeli otalardy júrgizý jáne halyqaralyq standarttarǵa saı medısınalyq kómek kórsetý ádisterin meńgerýge baǵyttalǵan.
- Mańǵystaýdan barǵan dárigerler Stambýldyń «Hisar Hospital» medısına ortalyǵy men «Medicana Health Group» klınıkasynda kásibı bilimderin jetildirdi. Ishki qyzmeti, bólimshelerdiń jumysymen tanystyq. Ár maman ózine tıesili otalarǵa qatysyp, tájirıbelerin shyńdady. Túrik dárigerlermen birlesip, bir kún qabyldaý bóliminde bolyp, naýqastarǵa tekserý jumysyn júrgizdik. Osyndaı múmkindik usynǵan basshylarǵa alǵys bildiremiz, - dedi №2 Aqtaý qalalyq emhanasynyń terapııalyq jáne hırýrgııalyq beıindegi mamandandyrylǵan kómek bóliminiń meńgerýshisi Aızada Qosbosınova.
Aıta keteıik, medısınalyq týr aıasyndaǵy bul sapar óńir dárigerleriniń kásibı deńgeıin arttyryp, sheteldik tájirıbeni kúndelikti jumysqa tıimdi engizýge múmkindik beredi.
Búgin, 20-28 tamyz aralyǵynda ótken kýrs óz máresine jetip, qatysýshylarǵa arnaıy sertıfıkat tabystaldy. Mundaı taǵylymdamalar oblys medısınasyn damytýda mańyzdy ról atqaryp, halyqqa kórsetiletin medısınalyq qyzmet sapasyn arttyrýǵa baǵyttalǵan.