Qasym-Jomart Toqaev «Kópjaqty yntymaqtastyqty damytý, óńirlik qaýipsizdik pen ornyqty damýdy qamtamasyz etý» taqyrybyna arnalǵan «ShYU plıýs» sammıtinde sóz sóıledi, dep habarlaıdy Aqordanyń baspasóz qyzmeti.
Qasym-Jomart Toqaev ShYU aıasyndaǵy qarjylyq, ekonomıkalyq, ınvestısııalyq jáne tehnologııalyq yntymaqtastyqty jandandyrýǵa baǵyttalǵan barlyq úderiske Qazaqstannyń belsendi qatysatynyn málimdedi.
— ShYU damý bankin qurý týraly bastamany quptaımyz. Onyń Uıymǵa múshe elderdiń ekonomıkasyn órkendetýdi maqsat etetin paıdaly qarjy ınstıtýty bolatynyna senimdimiz. Qazaqstan óńirdegi ózara baılanysty odan ári nyǵaıtý isine jan-jaqty járdemdesýge daıyn. «Bir beldeý, bir jol» jobasyn odan ári damytýǵa jáne ony Eýrazııalyq ekonomıkalyq odaqpen, sondaı-aq Soltústik — Ońtústik, Orta dáliz baǵyttarymen ushtastyrýǵa muqııat mán berý qajet, - dedi Prezıdent.
Memleket basshysynyń pikirinshe, jasandy ıntellektini qoldanýdyń erejesi men etıkalyq standarttaryn ázirleý ózekti máselege aınaldy. Bul rette ol Qytaıdyń Jasandy ıntellekt salasyndaǵy yntymaqtastyq boıynsha jahandyq uıym quryp, shtab-páterin Shanhaıda ornalastyrý usynysyna qoldaý bildirdi.