Memleket basshysy Qasym-Jomart Toqaev «Ádiletti Qazaqstan: zań men tártip, ekonomıkalyq ósim, qoǵamdyq optımızm» atty 2024 jylǵy Joldaýynda Úkimet pen ákimderge sıfrlandyrý men jasandy ıntellektini damytýǵa aıryqsha nazar aýdarýdy tapsyrdy. Prezıdent «Elektrondy úkimet» platformasyna JI tehnologııalaryn barynsha engizý qajettigin atap ótip, bul baǵytty ekonomıkalyq ósimniń basty draıverine aınaldyrýdy mindettedi, dep habarlaıdy Egemen.kz.
2021 jyldan bastap júrgizilip kele jatqan aýqymdy sıfrlyq transformasııa aıasynda Qazaqstan Respýblıkasy mınıstrlikterinde memlekettik basqarý tıimdiligin arttyrýǵa, ákimshilik jáne sybaılas jemqorlyq kedergilerdi azaıtýǵa, sondaı-aq azamattar men bızneske kórsetiletin qyzmetterdiń sapasyn jaqsartýǵa baǵyttalǵan sıfrlyq sheshimder kesheni engizildi.
Bul kóleńkeli ekonomıkadan 28 mlrd teńgeden astam qarajatty shyǵaryp, 13 mlrd teńgeden astam bıýdjet qarajatyn únemdeýge múmkindik berdi. Engizilgen sheshimderdiń jalpy tıimdiligi 51,3 mlrd teńgeni qurady. Memlekettik qyzmetterdi kórsetý merzimi 20 esege qysqardy. Sybaılas jemqorlyq jáne ákimshilik kedergiler tómendedi.
Klıentke baǵdarlanǵan, ashyqtyq, tıimdilik jáne barynsha avtomattandyrý qaǵıdattaryna negizdelgen memlekettik basqarýdyń platformalyq modeli engizilýde. Qyzmet kórsetý prosesinde azamattyń qatysýyn barynsha azaıtatyn proaktıvti qyzmet kórsetý mehanızmderi iske qosyldy.
Sıfrlyq úkimetti qoldaý ortalyǵy quryldy, sondaı-aq Sıfrlyq úkimet ofısimen birlesip bıznes-prosesterdi reınjınırıngteý tájirıbesi engizildi. Bul tıimdi sheshimderdi taldaýǵa, qaıta jobalaýǵa jáne aýqymdaýǵa múmkindik beredi.
«Qazaqstan sıfrlandyrý boıynsha álemdegi 193 eldiń ishinde 24-orynda tur. Al onlaın qyzmetter ındeksi boıynsha top on elge kiredi. Qazir memlekettik qyzmetterdiń 92%-yn onlaın alýǵa bolady», dedi sıfrlyq damý, ınnovasııa jáne aeroǵarysh ónerkásibi mınıstri Jaslan Mádıev.