Qazaqstan-Qytaı bıznes-forýmy aıasynda eki el tarapynan keńistiktik-ýaqyttyq jasandy ıntellekt salasyndaǵy Qazaqstan-Qytaı ǵylymı-tehnologııalyq ınnovasııalar alıansyn qurý jáne «Bir beldeý — bir jol» Birlesken zerthanasyn qalyptastyrý týraly kelisimge qol qoıylǵany belgili. Alıans Memleket basshysynyń QHR-ǵa resmı sapary barysynda joǵary deńgeıde qol qoıylǵan negizgi qujattar paketi quramyna enedi ári Ortalyq Azııadaǵy ǵylymı-tehnologııalyq yntymaqtastyqty nyǵaıtýdaǵy mańyzdy qadam, dep jazady Egemen.kz.
Alıans ǵylym, bilim men ónerkásiptiń ózara yqpaldastyǵyn jedeldetý, transshekaralyq tehnologııalar transferin damytý jáne Qazaqstan men óńirde jasandy ıntellekt ındýstrııasyn jańǵyrtýǵa arnalǵan ashyq platforma retinde qurylyp otyr.
Alıanstyń quryltaıshylary – Prezıdent janyndaǵy Ulttyq ǵylym akademııasy, Chjeszıan tehnologııalyq ýnıversıteti (QHR), Qazaq ulttyq agrarlyq zertteý ýnıversıteti jáne Zhejiang Zhonghe Technology Co., Ltd. (QHR).
Ulttyq ǵylym akademııasynyń prezıdenti A.Kúrishbaev ǵalymdardyń QHR-ǵa saparynyń mańyzdy tetikterine toqtalyp, halyqaralyq áriptestik aıasynda iske asatyn negizgi baǵyttardy atady.
Olardyń qatarynda:
Keńistiktik-ýaqyttyq ıntellekt jáne turaqty damý jónindegi birlesken zerthanany damytý;
Elimizdegi alǵashqy iri jasandy ıntellekt tildik modelin DeepBas ázirleý;
Tótenshe jaǵdaılar, ekologııa, energetıka jáne turaqty damý salalaryna arnalǵan jasandy ıntellektiń servıstik platformasyn qurý;
Spýtnıktik tehnologııalardy, ushqyshsyz júıelerdi, sensorlar men «Beıdoý» navıgasııasyn ıntegrasııalaý men birlesken bilim berý baǵdarlamalary arqyly kadrlar daıarlaý;
Oqytýshylarmen almasý, jańa oqýlyqtar men oqý resýrstaryn shyǵarý josparlanyp otyr.
Aldaǵy bes jylda eki elde bakalavrıat, magıstratýra jáne doktorantýra baǵdarlamalary boıynsha keminde 100 stýdentti daıyndaý, sondaı-aq jyl saıyn 200-den astam mamandy kásibı oqytý josparlanǵan. Mańyzdy nátıjelerdiń biri — DeepBas modelin engizý, ekologııalyq monıtorıng júıelerin, smart aýyl sharýashylyǵyn, kólik jáne energetıkalyq qaýipsizdik sheshimderin damytý bolmaq.
Joba elimiz úshin aýyl sharýashylyǵy, kólik jáne energetıka salalaryna ozyq tehnologııalardy engizýde, al aspan asty eli úshin aımaqtaǵy ǵylymı-bilim berý jáne tehnologııalyq yntymaqtastyqty keńeıtý múmkindigi retinde strategııalyq mańyzǵa ıe.
Ǵalymdardyń pikirinshe, eki el arasyndaǵy bilim men ǵylym yntymaqtastyǵy uzaq merzimdi perspektıvada «Bir beldeý — bir jol» bastamasy aıasyndaǵy yntymaqtastyq bilim men tehnologııalardyń tıimdi transferin qamtamasyz etip, óńirdiń ǵylymı-bilim berý áleýetin nyǵaıtady jáne jańa býyn zertteýshiler men mamandardy daıarlaýǵa jol ashady.
Almaty