Kishi serjant daıarlaıtyn áskerı kolledj

Dástúr boıynsha merekelik is-shara Keńes Odaǵynyń batyry general-maıor Sabyr Rahymovtyń eskertkishine gúl shoq­taryn qoıýmen bastaldy. Sodan soń aty ańyzǵa aınalǵan áskerı qolbasshyny bir mınýt únsizdikpen eske aldy. Buǵan oqý ornynyń jeke quramy, jergilikti ákimdik qyzmetkerleri men qoǵam belsendileri, sondaı-aq qarýly kúshter ardagerleri men «Jas sarbaz» áskerı-patrıottyq qozǵalysynyń tárbıelenýshileri qatysty.

Ári qaraı Qorǵanys mınıstri avıasııa general-leıtenanty D.Qosanov pen qala basshysy Ǵ.Syzdyqbekov oqý ǵımaratynyń basty kireberisinde qyzyl lentany qıdy. Osynaý saltanatty rásimdi áskerı orkestr mýzykamen súıemeldep turdy. Qorǵanys salasyna jaýapty mınıstr saltanatty is-sharaǵa qatysýshylardy aıtýly oqıǵamen shyn júrekten quttyqtady.

– Jańa kolledj batyldyqtyń, áskerı boryshqa adaldyqtyń, Otanǵa degen súıispenshiliktiń ónegesi bolǵan dańqty komandır, keńes odaǵy tusyndaǵy tuńǵysh qazaq generaly Sabyr Rahymovtyń esimimen atalady. Sabyr Rahymov – abyroı men batyl­dyqtyń bıik úlgisin kórsetken qazaq­tyń perzenti. Sender oqıtyn orynǵa erekshe mindet júktelgen. Ol mindet – qıyn jaǵdaılarda jyldam sheshim qabyldaı alatyn, kásibı qabileti joǵa­ry jáne árbir isin jaýapkershilikpen atqa­ratyn bilikti serjanttardy daıarlaý. Garnızonnyń áskerı qyzmetshilerine jan-jaqty kóńil bólgeni, qoldaý kórsetkeni jáne áskerı bólimder men mekemelerdi abattan­dyryp, áleýmettik qamsyzdandyrý máse­lesine jiti nazar aýdarǵany úshin Shymkent qalasy áki­mine shynaıy alǵy­sym­­dy bil­di­re­min, – dedi avıasııa general-leıtenanty D.Qosanov.

Qorǵanys mınıstri rızashylyǵyn bildirý maqsatynda Ǵabıt Syzdyqbekovke «El qorǵany» salalyq medalin tabys etti. Mınıstr oqytýshylar men komandırlerge arnaǵan sózinde tárbıelenýshilerge kásibı daǵdylardy úıretip qana qoımaı, olardyń boıyna rýhanı-adamgershilik qundylyqtar, ulttyq rýhty jáne patrıotızmdi sińirýge talpynyńdar dep atap ótti. Sondaı-aq ol bolashaq serjant­tar­ǵa myqty densaýlyq pen oqýda ozat bolýdy jáne táýelsiz memlekettiń órkendeýi jolynda tolaǵaı tabystar men bıik maq­sat­tarǵa jetýdi tiledi.

Ashylý saltanaty barysynda áskerı kolledj ulany Sabyr Qoshqarbaı sóz sóılep, stýdentterdiń alańsyz bilim alýyna jasalǵan jaǵdaı úshin basshylyq quramǵa alǵysyn bil­­dir­­di. Áskerı mamandyqty ıgerýge bel býǵan kýrstastary da onyń sózin qostaı jónel­di.

– Áskerı maman bolý meniń bala kezden armanym edi. Sondyqtan osy oqý ornyna túskende qýanyshtan tóbem kókke eki eli jetpeı qaldy. Eń tańdaýlylar túsken kolledjde endi sabaqty jaqsy oqýymyz kerek. Ata-anamyzdyń úmitin aqtap, el qorǵaıtyn naǵyz áskerı maman bolyp shyǵamyz degen úmittemiz. Sol úshin oqý ornynyń ishki tártibin buzbaı, jaqsy bilim alyp, ustazdardyń aıtqanyn buljytpaı oryndaımyz. Elimizdiń damýy jolynda árkim shamasyna qaraı eńbek etip jatyr. Ár saladaǵy mamandardyń jumysy týǵan jerdi túletýge úles qosyp jatyr dep esepteımin. Sonyń ishinde qyzmeti Otan qorǵaýǵa arnalǵan mamandardyń eńbegi erekshe dep bilemin. Olar árdaıym eli men jeri úshin janyn birinshi qııýǵa daıar turady. Áskerı adamnyń qyzmeti sonysymen de qadirli, – dedi S.Qoshqarbaı.

Osydan keıin bilim uıasynda erekshe kózge túsken áskerı qyzmetshilerdi marapattaý rásimi ótti. Kolledjdiń jeke quramynyń saltanatty sherýi men áskerı tehnıkanyń úlgileri qoıyldy. Sondaı-aq alańda qoıan-qoltyq urystyń tásilderi kórsetildi. Ulandarmen bolǵan kezdesýden soń qonaqtar oqý ǵımaratyn, kazarma, kitaphana, murajaı, ashana, sport zaly men stadıondy aralap shyqty. Áskerı oqý ordasynyń materıaldyq-tehnıkalyq bazasy talapqa saı ekenine kózi jetken qonaqtar mundaı bilim uıasy elimizdegi biregeı oqý oryndarynyń biri dep maqtanyshpen aıtýǵa bolatynyn jetkizdi. Rasynda da, jas áskerı sarbazdardyń sapaly bilim alýyna munda bar jaǵdaı jasalǵan. Kolledjde dene tár­bıesi jattyǵýlaryna da erekshe kóńil bólinedi. Sondyqtan sporttyq qural­dar­dyń barlyq túrimen qamtamasyz etilgen. Arnaıy dárigerler stýdentterdiń den­saý­lyq jaǵdaıyn jiti qadaǵalap otyrady.

Áskerı qyzmetker tek fızıkalyq tur­ǵydan myqty bolýmen qatar atys qarý­la­ryn jaqsy meńgergen, oı-órisi damyǵan zerek adam bolý kerek. Osy jaǵynan kelgende oqý ornynda shákirtterdiń bilim alýy­na, qarýly kúshter tehnıkasynyń tilin bilip, urys júrgizýdiń tásilderin úırenýge barynsha jaǵdaı qarastyrylǵan. Bul – birinshi kezekte bilikti ustazdardyń beretin arnaıy dáristeri. Olardan tálim alǵan stýdentter keleshekte naǵyz bilimdi áskerı qyzmetker bolyp shyǵady. О́z kezeginde ustazdar shákirtterge sabaqty barynsha qyzyqty ótkizýge tyrysady. Sol úshin arnaıy oqytý tásilderin qoldanyp otyr. Bilim alýshylarǵa túsinikti bolý úshin kórneki quraldardy da kóbirek paıdalanady. Ol jas sarbazdyń ótilgen sabaqty tez uǵynyp, túpki mánin túsiný úshin kerek. Ekinshiden, kolledjde baı kitaphana qory bar. Ol jerden áskerı saladaǵy oqýlyqtardan bastap túrli janrdaǵy ádebıet­terdi tabýǵa bolady. Stýdentter anda-sanda kórkem ádebıetti de qolyna alyp, rýhanı sýsyndap turady. Bolashaq áskerı qyzmetker bir jaqty emes, jan-jaqty oılaı biletin, kózi ashyq kókiregi oıaý azamat bolý úshin kóp oqyp tereń bilim alý qajet. Osy turǵydan alǵanda kolledjde shákirtterdiń zeıinin ashyp, oqýǵa degen yntasyn arttyrýǵa áskerı pedagogter tarapynan kóp jumys jasalyp jatyr. Keleshekte oqý ordasyn támam­daǵan túlekter elimizdiń áskerı salasyn nyǵaıtýǵa, qorǵanys kúshterin berik etýge aıanbaı úles qosady.

Aıta ketý kerek, áskerı kolledj teh­nıka­lyq jáne kásiptik bilim berý baǵ­dar­lamasy boıynsha kishi komandalyq quramdy daıarlaıdy. Oqý merzimi 2 jyl 10 aıdy quraıdy. Osy merzim aralyǵynda jasulandyqtar motoatqyshtar, tank, zymyran jáne artıllerııalyq bólimshelerdi basqarý mamandyqtary boıynsha dıplom alyp shyǵady. Kolledjdi sátti aıaqtaǵan túlekterge kishi serjant áskerı ataǵy beriledi. Áskerı kolledjge 15 pen 17 jas aralyǵyndaǵy elimizdiń kez kelgen azamaty qabyldanady. Osy jyly konkýrs nátı­­jesinde general Sabyr Rahymov atyn­da­ǵy áskerı oqý ordasyna 168 jas talapker qabyl­­dandy.

Jumys sapary aıasynda Qorǵanys mınıstri Shymkent garnızonynda jaýyn­ger­lik daıyndyq pen qyzmet jaǵdaı­laryn tekserdi. Avıasııa general-leıtenanty D.Qosanov Shymkenttegi birqatar áskerı bólim­der men mekemeler­­di aralap, olar­dyń qyzmetimen, ınfraqury­ly­my­men jáne áskerı qyzmetshilerge jasal­ǵan jaǵ­daı­men tanysty.

2 qyrkúıekte elimizde kúzgi áskerge shaqyrý naýqany bastalǵany belgili. Osyǵan oraı mınıstr qalalyq shaqyrý pýnktine baryp, áskerge shaqyrylýshylardyń jaǵdaıy qalaı ekenin, medısınalyq komıssııadan ótý tártibin zerdeledi. Sondaı-aq alǵashqy shaqyrylýshylar men Qarýly kúshterdiń ardagerlerimen suhbattasty. Qorǵanys salasynyń basshysy Arnaıy operasııalar kúshteri bólimsheleriniń ınfraqurylymynda bolyp jaýyngerlik daıyndyq deńgeıin baǵam­dady. Oqý-jattyǵý kesheninde mınıstr ǵımaratty shabýyldaý men qala jaǵ­­daıynda urys qımyldaryn júrgizýdiń ádis­terin tamashalady.

Qalalyq aýmaqtyq qorǵanys brıgadasynda mınıstrge rezervtegi áskerı qyzmet­­shilerdi qaıta daıarlaý is-shara­synyń oryndalýy jóninde baıandaldy. Sala basshysy tájirıbelik sabaqtar ótkizýge arnalǵan ınfraqurylymmen, sonyń ishinde arnaıy shabýyldaý jolaǵymen tanysyp shyqty. D.Qosanov óz sózinde mundaı jattyǵýlardyń jeke quramnyń kásibı daıyndyǵyn arttyryp, kúrdeli jaǵdaılarda úılesimdi ári tıimdi áreket etýine yqpal etetinin atap ótti.

«Ońtústik» óńirlik qolbasshylyǵy áskerleriniń eń iri quramalarynyń biri – mehanıkalandyrylǵan brıgadada mınıstr merzimdi áskerı qyzmetshilerge jasalǵan áleýmettik-turmystyq jaǵdaı­lar­ǵa erek­­she nazar aýdarylǵanyn kózben kórdi. Máselen, sarbazdar jeke gıgıe­­na­lyq quraldarmen tolyq qamta­­masyz etilgen. Árbir shaǵyn jıhazda qa­jet­­ti zattardyń tolyq jıyntyǵy saq­talǵan. Sonymen qatar elimizdiń qor­ǵany­­syna jaýapty sala basshysy jeke quram­dy me­dısınalyq qamtamasyz etýdi uıym­das­ty­rý­daǵy oń tájirıbege de erekshe toq­talyp ótti.

Áskerı mamandardyń aıtýynsha, bólim­de árbir sarbazǵa arnalǵan jeke medı­­­sı­nalyq karta júrgiziledi. Onda den­saý­lyq jaǵdaıy týraly barlyq máli­met tirkelip otyrady. Bul júıe sarbaz­dardyń qajettilikterin anyqtap, olardy tıisti dári-dármekpen ýaqtyly qam­ta­ma­syz etýge múmkindik beredi. Mınıstr tótenshe jaǵ­daılar kezindegi alǵashqy medı­sı­nalyq kómek kórsetý daǵdy­larynyń mańyz­dy­ly­ǵy aıryqsha ekenin jetkizdi.

Sonymen, issapar qorytyndysynda Qorǵanys mınıstri merzimdi áskerı qyzmetke shaqyrylýshylardy sapaly irikteý men jeke quramdy oqytý jáne jaýyngerlik daıyn­dyq ádisterin jetildirý jóninde birqatar naqty tapsyrmalar berdi.