Almaty oblysynyń ortalyǵy Qonaev qalasynyń qurylǵanyna bıyl 55 jyl tolyp otyr. Osyǵan oraı, qalada alty kúndik túrli sporttyq, mádenı, tanymdyq, qaıyrymdylyq is-sharalar baǵdarlamasy jasalyp, shahar kóginde áýezdi án-kúı qalyqtaıdy. Mereıtoı shymyldyǵy qalalyq mádenıet úıinde «Qonaev áýenderi» ansambliniń tusaýkeser konsertimen ashyldy.
Sondaı-aq bul kúni asa kórnekti kompozıtor Nurǵısa Tilendıevtiń 100 jyldyǵy men qazaqtyń birtýar aqyny Tumanbaı Moldaǵalıevtiń 90 jyldyǵy qatar atalyp ótti. Merekelik keshte olardyń repertýarynan «Qaırat», «Aqqý kúıleri, «Qustar qaıtqanda», «Kýá bol», «Alataý» ánderi shyrqaldy. Budan basqa da bı kompozısııalary oryndalyp, tyńdarman júregin terbedi.
«Qonaev qalasy oblys ortalyǵy bolǵaly túrli is-sharalardy uıymdastyrýdamyz. Sonyń ishinde búgingisi erekshe áser qaldyryp otyr. «Qonaev áýenderi» ansambliniń quramynda ánshiler, bıshiler, kúıshiler, túrli aspapta oınaıtyn ónerpazdar bar. Bul ujym aldaǵy ýaqytta barlyq merekelik sharaǵa qatysyp, el mádenıetin damytýǵa atsalysady», dedi qala ákiminiń orynbasary Tólegen Kenjebekov.
Mádenıeti men ádebıeti jandanyp, rýhanııat ortalyǵyna aınalǵan shahardyń ónerin óristeter óz ansambli bolǵanyna jergilikti turǵyndar da qýanyp otyr.
«Bıyl qazaq dalasynda halqymyzdyń mańdaıyna bitken hakim Abaı Qunanbaıuly bastaǵan uly tulǵalardyń, ádebıet pen mádenıettiń marqasqalarynyń mereıtoılary keń kólemde atap ótilýde. Osyndaı ıgi sharalarǵa ár berip, shyǵarmashylyq keshterdi sharyqtatar «Qonaev áýenderi» ansambliniń qurylǵanyna balasha qýanyp otyrmyz. Endi óz óner ujymymyz bar. Qalamyzdyń 55 jyldyǵy qutty bolsyn!», deıdi qala turǵyny Aıbek Erejep.
Almaty oblysy