Atyraýdaǵy qonaq úıdiń birinde munaı óńdeý zaýytynyń burynǵy bas dırektory Murat Dosmuratov ómirden ótti. Onyń qazasyna júrek talmasy sebep bolǵan, dep habarlaıdy Egemen.kz.
Murat Dosmuratov 1963 jyly týǵan. Máskeý munaıhımııa jáne gaz ónerkásibi ınstıtýtyn «Injener-hımık-tehnolog» mamandyǵymen bitirgen. Ár jyldary «QazMunaıGaz», Kazakhstan Petrochemical Industries, KLPE sekildi munaı-gazz ónerkásibindegi kompanııalarda basshylyq laýazymdy atqarǵan. Al 2022 jyldyń shildesinen 2024 jyldyń qańtaryna deıin Atyraý munaı óńdeý zaýytynyń bas dırektory boldy.
Alaıda byltyr oǵan Qylmystyq kodekstiń 371-babynyń 2-bóligimen aıyp taǵylǵan edi. Atyraý qalasynyń №2 soty ony atalǵan bappen kináli dep tanydy. Al bıylǵy qańtarda Atyraý oblystyq sotynyń apellıasııalyq alqasy «AMО́Z» JShS-niń burynǵy bas dırektoryna qatysty úkimdi qaıta qarady.
«Birinshi saty sotynyń úkimi ózgertilip, sottalýshyǵa QR Qylmystyq kodesiniń 371-babynyń 2-bóligi boıynsha 6,9 mln teńge (2023 jylǵa 2 000 AEK) kóleminde aıyppul salý jazasy taǵaıyndaldy», dep habarlaǵan edi oblystyq sottan.
Degenmen, tamyzda bul is Atyraý oblystyq sotynyń qylmystyq ister jónindegi sot alqasynda birinshi satydaǵy tártippen «AMО́Z» JShS-niń burynǵy bas dırektory Murat Dosmuratovqa qatysty qylmystyq is qaraldy.
«Prokýrordyń memlekettik aıyptaýdy qoldaýdan bas tartýyna, Dosmuratovtyń áreketterinde qylmystyq quqyq buzýshylyq quramynyń bolmaýyna baılanysty toqtatyldy. Dosmuratovqa qylmystyq prosesti júrgizetin organnyń zańsyz áreketteri saldarynan keltirilgen zııandy óteý jáne ońaltý quqyǵy túsindirildi», dep málim etti oblystyq sottyń baspasóz qyzmeti.