Búgin Májilis qurylys qyzmetin qaǵazbastylyqtan aryltatyn qujatty qarap jatyr. Jalpy otyrysta О́nerkásip jáne qurylys mınıstri Ersaıyn Naǵaspaev Qurylys kodeksiniń jańa jobasyn tanystyrdy, dep habarlaıdy Egemen.kz.
Mınıstr qurylys salasynda engizilip jatqan jańa júıeniń mán-jaıyn túsindirdi. Onyń aıtýynsha, bul júıe árbir qurylys nysanyna «JSN-ge uqsas» biregeı nómir berýdi kózdeıdi.
«Nysannyń biregeı nómiri degen shynymen de jańashyldyq dep aıtýǵa bolady. Kúndelikti ómirmen salystyrsaq, ol ár adamda bar JSN-ge uqsaıdy. Biregeı nómir memlekettik qala qurylysy kadastrynda jobalaý kezeńinde avtomatty túrde beriledi jáne nysannyń búkil ómirlik sıklynda — josparlaý, saraptama, qurylys, tipti ýtıldeý kezeńinde de birge júredi», dedi Ersaıyn Naǵaspaev.
Naǵaspaevtyń aıtýynsha, mundaı tásil qurylys sapasyn baqylaýdy jeńildetip qana qoımaı, bolashaqta nysandy jańǵyrtýǵa da yńǵaıly. Buǵan deıin kóptegen ǵımaratty paıdalaný kezinde bastapqy qujattardy tabý qıyndyq týǵyzǵan. Endi biregeı nómir arqyly júıeden barlyq málimetti bastapqy jobadan bastap, paıdalanylǵan materıaldar men qurylys tehnologııalaryna deıin tolyq kórýge múmkindik týady.
«Biregeı nómir arqyly sıfrlyq formatta nysandy qadaǵalap otyrýǵa bolady», dedi О́nerkásip jáne qurylys mınıstri.