Búgin Májilistiń jalpy otyrysynda depýtat D.Turlyhanov medısına salasyndaǵy kadrlar tapshy ekenin aıtyp, bul óz kezeginde aýyldyq jerlerde medısınalyq qyzmet sapasyna keri áser etip otyrǵanyna toqtaldy, dep jazady Egemen.kz.
2024 jyldyń qorytyndysy boıynsha elimizde dárigerler tapshylyǵy 3 954 mamandy quraǵan. Sonymen birge, orta býyn medısına qyzmetkerleriniń jetispeýshiligi 4 505 adam deńgeıinde qalyp otyr.
2025 jylǵy 1 qańtardaǵy jaǵdaı boıynsha eldiń densaýlyq saqtaý júıesinde shamamen 275 myń medısına qyzmetkeri jumys isteıdi, onyń ishinde 83 myńnan astamy dárigerler, al 191 myńǵa jýyǵy orta medısınalyq qyzmetkerler.
Elimizde terapevt, jalpy praktıkalyq dáriger, pedıatr, akýsher-gınekolog, hırýrg men anestezıolog-reanımatolog kadrlar tapshy.
D.Turlyhanov salany bıýdjettik qarjylandyrýdyń qysqarýy da máseleniń sheshilýine kedergi bolyp otyrǵanyn aıtty.
«2025 jyly densaýlyq saqtaý salasyna 2 trln teńge qarastyrylǵan, alaıda 2024 jyly qarjylandyrý 2,8 trln teńgeni qurady.
Saqtalyp otyrǵan kadr tapshylyǵy, dárigerlik quramnyń qartaıýy jáne bastapqy býynǵa túsetin júktemeniń ósýi - bul densaýlyq saqtaýdy damytý jónindegi ulttyq jobalar men baǵdarlamalardy iske asyrýdy aıtarlyqtaı baıaýlatýy múmkin», dedi depýtat.
Sondyqtan D.Turlyhanov saladaǵy kadr tapshylyǵy eń joǵary óńirlerdegi dárigerler men orta býyn medısına qyzmetkerlerine memlekettik qoldaý sharalaryn qabyldaýdy usyndy.
«Máselen sala mamandaryna áleýmettik jeńildikter berý, qyzmettik turǵyn úımen qamtamasyz etý, kóterme tólemder men maqsatty daıarlyqqa arnalǵan bilim granttaryn bólý, sondaı-aq tálimgerlik pen qaıta daıarlaý júıesin damytý qajet. Densaýlyq saqtaý salasyn qarjylandyrý kólemin kezeń-kezeńimen arttyrý múmkindigin qarastyrý, ásirese medısınalyq qyzmetkerlerdi yntalandyrý, aýyldyq jerlerde jumys isteıtin mamandarǵa eńbekaqynyń qosymsha koeffısıentin engizý jáne salalyq bıýdjettiń qurylymynda kadrlyq damýǵa arnalǵan shyǵystardyń úlesin kóbeıtý kerek. Qazaqstan Respýblıkasynyń densaýlyq saqtaý salasyn damytýdyń 2030 jylǵa deıingi konsepsııasynyń jobasynda kadrlardy bólýdiń ornyqty tetigin qurý jáne turatyn jerine qaramastan halyqtyń bilikti medısınalyq kómekke qol jetkizýin qamtamasyz etetin mobıldi medısınalyq brıgadalardy damytý kózdelsin», dedi D.Turlyhanov.
Medısınada kadr tapshylyǵy sezilip otyrǵan aımaqtar qatarynda Qostanaı oblysy bar. 2025 jyldyń birinshi jartyjyldyǵynyń qorytyndysy boıynsha óńirde kadr tapshylyǵy 326 mamandy quraǵan. Dál osyndaı máseleler Aqmola, Jambyl, Túrkistan oblystarynda tirkelgen. Sondaı-aq jekelegen aýdandyq aýyldyq jerlerde dárigerlermen qamtamasyz etilý shtattyq deńgeıdiń 75%-yna áreń jetedi.