Úkimette Premer-mınıstrdiń orynbasary – Ulttyq ekonomıka mınıstri Serik Jumanǵarınniń tóraǵalyǵymen ótken keńeste «Báıterek» holdıngi jańa qurylymynyń jobasy qaraldy.
Transformasııanyń negizgi maqsaty – holdıngti ınvestısııa tartýdyń basty draıveri men elimizdiń ishki jalpy ónimin 2029 jylǵa qaraı eki ese arttyrýǵa baǵyttalǵan proaktıvti ekonomıkalyq ósý saıasatyn iske asyratyn negizgi quralǵa aınaldyrý. Eldiń jańa ekonomıkalyq ósý saıasaty ınvestısııaǵa baǵyttalǵan maqsatty kózqarasymen – memlekettiń naqty qajettiligine negizdelgen «jobaǵa tapsyrys» qaǵıdaty arqyly erekshelenedi.
Bul modeldi júzege asyrýda basty ról «Báıterek» holdıngine júkteledi. Aldaǵy tórt jylda memleket jyl saıyn holdıngtiń kapıtalyn 1 trln teńgege arttyryp otyrady. Al «Báıterek» jylyna 8 trln teńgege deıin syrtqy qaryz qarajattaryn tartyp, basym jobalardy qarjylandyrady. Qazirgi basqarýshy holdıng retindegi qurylym jańa ınvestısııalyq mıssııanyń aýqymy men mindetterine saı jańǵyrady.
Negizgi basymdyq – ınvestısııaǵa shoǵyrlaný, salalyq mamandaný men naryqtyq taldaýdy kúsheıtý. Keıingi 30 jyldaǵy ekonomıkanyń qurylymyn taldaý nátıjesi eń joǵary qosylǵan qun metallýrgııa, mashına jasaý, hımııa, agroónerkásip pen tamaq ónerkásibinde qalyptasatynyn kórsetti. Bul salalar strategııalyq baǵyttar bolyp qala beredi. Buǵan qosa, saýda, qarjy men qurylys salalary da jańa basymdyqtar qataryna enedi.
Osy salalar negizinde ınvestısııalyq holdıngtiń quramynda jeti Investment Board (ınvestısııalyq qyzmet) qurylady. Olar naqty sektordyń ósý núktelerine aınalyp, joǵary qosylǵan qun qalyptastyratyn jańa jobalardy ázirleý men iske asyrýǵa qatysady. Sondaı-aq bıznes tarapynan túsken jobalyq usynystardy ekonomıkalyq ósim mindetterine sáıkestigi turǵysynan saraptaıdy.
«Investısııalyq jobalardyń bolashaǵy – eksportta. Biz aýyl sharýashylyǵyn qoldaýdyń naqty nátıjesin kórip otyrmyz: ónimdiliktiń artýy men ınvestısııalar esebinen sheteldik kompanııalar qazaqstandyq AО́K-tiń áleýetine qyzyǵýshylyq tanytyp, óz tehnologııalaryn engizip jatyr. «Báıterek» eksportqa baǵyttalǵan kásiporyndar ekojúıesin qalyptastyryp, olardyń ónim ótkizý naryǵyn keńeıtýine, qosylǵan qun tizbegin qurýyna ári syrtqy naryqtarǵa shyǵýyna yqpal etedi», dedi holdıng basqarmasynyń tóraǵasy Rýstam Qaraǵoıshın.
Ishki naryqty keń tutyný taýarlarymen qamtamasyz etý maqsatynda, búginde kóbisi ımportqa táýeldi taýarlar boıynsha «Investısııaǵa tapsyrys» baǵdarlamasy iske qosylady. Bul baǵdarlama sheńberinde memleket ózi basym jobalar men olardyń ornalasatyn óńirlerin aıqyndap, bıznesten olardy júzege asyrýdy usynady.
Baǵdarlama aýyl sharýashylyǵy salasynda daıyndalǵan, endi osyndaı tásilder turmystyq hımııa, azyq-túlik pen basqa da baǵyttar úshin engizilmek. Buǵan qosa Dırektorlar keńesiniń quramy keńeıtilip, táýelsiz músheler qataryna jetekshi halyqaralyq salalar men óńirlerden ınvestısııalyq keńesshiler tartylady. Bul sheshimderdiń ashyqtyǵyn, táýekelderdi keshendi baǵalaýdy, jobalardyń tabysyna áser etetin barlyq faktordy eskerýdi qamtamasyz etedi.
Holdıngti transformasııalaý jónindegi rásimderdiń barlyǵy jyl sońyna deıin aıaqtalyp, kelesi jyldyń basynda elimizdiń proaktıvti ekonomıkalyq ósim baǵdarlamasyn iske asyrý jumysy bastalady.