Qazaqstandaǵy eń jas jáne tájirıbeli memlekettik qyzmetkerlerdiń tizimi jarııalandy. Ranking.kz usynǵan tizimge mınıstrler men olardyń orynbasarlary, oblys jáne qalalardyń ákimi, sondaı-aq, respýblıkalyq deńgeıdegi iri memlekettik qurylymdardyń jetekshileri engen, dep habarlaıdy Egemen.kz.
Qazaqstandaǵy eń tájirıbeli sheneýnikterdiń qatarynda OSK tóraǵasy Nurlan Ábdirov pen Ekologııa jáne tabıǵı resýrstar mınıstri Erlan Nysanbaev bar. Ekeýiniń jasy 64-ke jetken. Eldiń jetekshi ekologynyń zeınetkerlik jas sheginen asyp ketýi BAQ ókilderiniń nazaryna ilikti. Bul rette Nysanbaev óziniń mol tájirıbesi men bilimin eskere otyryp, qyzmetin jalǵastyrýǵa quqyǵy bar ekenin málimdegen.
Qarasha aıynyń sońynda zeınetkerler qataryna taǵy bir tájirıbeli sheneýnik – Ishki ister mınıstrliginiń orynbasary Igor Lepıoha qosylady. Ranking.kz málimetinshe, sheneýnik jýrnalısterdiń ótkir suraqtaryna salmaqty ári dáıekti jaýap beredi. Ol Qostanaıǵa qatysty separatıstik pikirlerdi toqtatyp, tek aqyldy baǵdarshamdar arqyly jol keptelisin sheshý ıdeıasynyń tıimsizdigin ashyq aıtqan. Sonymen qatar Jetisý oblysynyń ákimi Beıbit Isabaev ta tájirıbeli sheneýnikter qatarynda. О́ziniń 40 jyldyq eńbek jolynda redaktor, baspasóz hatshysy, elshi, senator jáne ákim bolyp qyzmet atqarǵan.
Al, zeınet jasyna jaqyndaǵan sheneýnikter qatarynda – Bas prokýror Berik Asylov jáne oblys ákimderi Marat Ahmetjanov, Narıman Tóreǵalıev pen Qumar Aqsaqalov bar. Bir qyzyǵy, Qumar Aqsaqalov jumysqa jaıaý barady eken. Árıne, bul qalypty jaǵdaı bolsa da, aımaq basshysynyń dál osy áreketi onyń halyqpen ashyq baılanysta ekenin kórsetedi. Sol úshin ony «halyq ákimi» dep atap ketken.
Sheneýnikterdiń naqty tabysy olardyń laýazymy men qyzmet ótiline baılanysty. Ulttyq statıstıka bıýrosynyń málimetteri boıynsha, ótken jyly oblys ákiminiń ortasha nomınaldy jalaqysy shamamen 1,7 mıllıon teńgeni qurady. Bul qosymsha tólemderdi, bonýstardy jáne basqa da jeńildikterdi qospaǵanda, bazalyq soma. Mınıstrler men olardyń orynbasarlary aımaqtyq basshylarǵa qaraǵanda sál az jalaqy alady – 1,5 mıllıon teńge.
Jalpy, mınıstrlerdiń orynbasarlary men qala ákimderiniń laýazymdaryn qazir 30 jastaǵy jáne 9 jyldan 15 jylǵa deıingi tájirıbesi bar adamdar ıelenedi.
Eń jas sheneýnikterdiń qatarynda – Oqý-aǵartý mınıstri Asylbek Ahmetjanov, 33 jastaǵy Túrkistan qalasynyń ákimi Ázimbek Pazylbekuly jáne 34 jastaǵy mınıstr orynbasarlary – Qaıyrhan Tutqyshbaev, Dmıtrıı Mýn jáne Bekbolat Moldabekov bar.
Aıta keteıik, tizimge engen sheneýnikterdiń kóbi Prezıdenttiń jastar kadrlyq rezervinen, al keıbiri alǵashqy jumys jyldaryn joǵary qyzmetten bastaǵan.
Máselen, О́skemen qalasynyń ákimi Almat Aqyshov eńbek jolyn konsert zalynda bılet kontroleri retinde bastaǵan, vıse-mınıstr Ermek Kenjehanuly ýnıversıtet kezinde óz betimen egistik egip, ónim jınaǵan. Al, Báskelestikti qorǵaý jáne damytý agenttiginiń basshysy Marat Omarov memlekettik qyzmetpen qatar Qazaqstan fýtbol federasııasyn basqarǵan.
Reıtıngtegi sońǵy ornyndy ekologııa jáne tabıǵı resýrstar vıse-mınıstri Mansur Oshyrbaev ıelendi.
Eń jas sheneýnikterdiń jalaqysy da ártúrli. Vıse-mınıstr deńgeıindegi qyzmetkerler 2024 jyly 1,5 mln teńge alǵan, oblystyq ákimderdiń jas orynbasarlary shamamen 836,9 myń teńge tabys tabady.