Búginnen bastap birjolǵy zeınetaqy jarnalary esebinen oftalmologııalyq qyzmetterdi tóleýge arnalǵan ótinimder qabyldanbaıdy. Bul týraly «Báıterek» holdınginiń enshiles uıymy «Otbasy bank» AQ-nyń baspasóz qyzmeti habarlady, dep jazady Egemen.kz.
Atalǵan qyzmet úshin ótinimdi qabyldaý Densaýlyq saqtaý mınıstrliginiń biryńǵaı jınaqtaýshy zeınetaqy qoryn (BJZQ) emdelýge paıdalaný erejelerine engizgen ózgeristerge baılanysty toqtatylyp otyr. Atalǵan buıryq kúni keshe jarııalanǵan. Buıryq mazmunyna saı endi zeınetaqy qarajatyn stomatologııalyq, oftalmologııalyq qyzmet qunyn tóleýge tyıym salynady.
Al búginge deıin jiberilgen ótinishter qabyldanyp, belgilengen tártip negizinde qaralady. Qazir bankte «oftalmologııa» baǵyty boıynsha bas-aıaǵy 13,3 mlrd teńge suratylǵan 15808 ótinim qaralyp jatyr.
Onyń ishinde 5131 ótinim (4,6 mlrd teńge) boıynsha bank mamandary qujattardy tekserip jatyr. Budan bólek 10 677 ótinim ıesi 8,7 mlrd teńge qosymsha qarjy suratqan.
«Otbasy bank» AQ-nyń baspasóz qyzmetiniń málimetinshe, stomatologııalyq qyzmetterge ótinimder toqtatylǵannan keıin oftalmologııaǵa suranys kúrt artqan.
15 qyrkúıekke deıin aıyna ortasha 174 ótinim maquldansa, shekteýler engizilgennen keıin bul kórsetkish 7 esege, ıaǵnı 1 264 ótinimge deıin artqan.
Sonymen qatar bank birqatar kúmándi fakt anyqtalǵanyn habarlady.
«Klıentter bir oftalmologııalyq klınıkamen kelisimshart jasasa da, qujattarda klınıkanyń ár qalada ornalasqan túrli mekenjaılary kórsetilgen. Tekserý barysynda belgilengen mekenjaılarda mundaı klınıkanyń joq ekeni anyqtaldy», delingen habarlamada.
Aıta keteıik, BJZQ-daǵy artyq qarajatty paıdalaný keı baǵyttar boıynsha toqtatylǵanymen, mynadaı mańyzdy jáne qymbat em túrlerine paıdalanýǵa bolady: • orfandyq (sırek) aýrýlardy emdeý; • rekonstrýktıvtik jáne qalpyna keltirý operasııalary; • radıonýklıdti jáne radıo-ıod terapııa; • radıohırýrgııalyq em; • protondyq terapııa.