Ulytaý oblysy, Sátbaev qalasynyń ákimi Murat Bóribaev baspasóz týryn uıymdastyryp, jýrnalısterdi abattandyrý jumystarymen, jańartylǵan jaıaý júrginshiler joldary, avtoturaqtar, balalar men sport alańdary, alleıalar jáne saıabaqtarmen tanystyrdy.
Qalanyń búgingi kelbeti turǵyndarǵa qolaıly, qaýipsiz, zamanaýı orta qurý baǵytynda birqatar jumys atqarylǵanyn anyq ańǵartady. Atap aıtsaq, qalanyń tómengi bóligindegi aýla aýmaqtary abattandyryldy. 16-shaǵyn aýdannyń aýla joldary men kireberisterine 14 000 sharshy metrden astam asfalt tóseldi. Bes qoqys alańy jańartylyp, evrokonteınerler ornatyldy. Jańadan úsh balalar oıyn alańy jasaldy. 64 jaryq shamy men eki jaryq baǵany ornatyldy. Qýraǵan aǵashtar kesildi. Jumystardy merdiger uıym «Jas urpaq» QQ ýaqytyly oryndap shyqty.
Qalanyń 8, 9-shaǵyn aýdandarynda merdiger «Ildas» JShS 21 000 sharshy metr asfalt tósedi. Bes balalar oıyn alańyn salyp, 72 jaryq baǵanyn, turǵyndar demalatyn 74 oryndyq, qoqys jáshikterin ornatty. Segiz konteıner alańy abattandyryldy.
15V-shaǵyn aýdannyń abattandyrý jumysyn «Aslan Qurylys KZ» JShS atqardy. Aýla joldary men kireberisterge 8 872 sharshy metr asfalt tóseldi. 30 jaryqtandyrý baǵany ornatyldy. 65 – 67 úılerdiń arasyndaǵy balalar oıyn alańy jabdyqtalyp, tórt qoqys konteınerleri alańy abattandyryldy.
Qaladaǵy «Ertegi» balabaqshasy men jalpy bilim beretin №25 mekteptiń avtoturaǵy salyndy. №25 mektep janyndaǵy jaıaý júrginshi joly jańadan jasaldy. №27, №14 mektepterdiń, «Ertegi», «Nurbóbek» balabaqshalary mańyndaǵy jaıaý júrginshiler joldary men avtoturaqtar abattandyryldy. Bul jumystardy «Aslan Qurylys KZ» JShS atqardy. Eski úılerdiń aýlalarynda balalardyń oıyn alańy qoldanysqa berildi. Barlyǵy 38 jańa oıyn alańy salyndy.
Qala ortasyndaǵy «Oqýshylar» alleıasy erekshe kóz tartady. Munda «Ildas» JShS aýqymdy qurylys-abattandyrý jumysyn júrgizdi. Jaıaý júrginshiler jolyna tósemtas, balalardyń oıyn alańyna jaraqat alý qaýpin azaıtatyn tartan jabyndysy tóseldi. Fýtbol alańynyń qorshaýy aýystyryldy. Sıren butalary men emen kóshetteri otyrǵyzylyp, sýarý júıesi tartyldy. Jańa jaryq shamdarynyń tirekteri, saıabaq shamdary ornatyldy. «Bilim baspaldaǵy» ınstallıasııasy, amfıteatr sahnasy oqýshylardyń túrli is-shara ótkizýine qolaıly. Alleıa balalar ǵana emes, ata-analar men turǵyndardyń da serýendep, demalatyn ornyna aınalǵan.
«№25 mekteptiń artqy aýmaǵy kóp jyldan beri qaraýsyz qalǵan, paıdalanylmaǵan bos alań boldy. Bıyl alǵash ret osy jerge «Oqýshylar» alleıasyn ashtyq. Maqsatymyz – oqýshylardyń ýaqyttaryn tıimdi ári paıdaly ótkizýine, sportpen, shyǵarmashylyqpen aınalysýyna múmkindik jasaý. Aldaǵy jyldan bastap barlyq kelýshilerge tegin Wi-Fi jelisi qoljetimdi bolady», deıdi qala ákimi M.Bóribaev.
«Taǵzym» alańy – urpaqqa halqymyzdyń talaıly tarıhynan syr shertetin oryn. О́kinishke qaraı, bul nysandy qalypqa keltirý jumysy birneshe jylǵa sozylǵan. Sońǵy úsh jyl ishinde merdiger uıymdar ózderine júktelgen mindettemelerdi oryndamaı, jumysty tolyq aıaqtamaǵan. Sol sebepti zań aıasynda jumys júrgizilgen. Bıyl bul mańyzdy isti basqa merdiger uıym qolǵa alyp, jumysty sapaly ári ýaqytyly aıaqtaýǵa bar kúshin jumyldyrdy. Alańnyń kelbeti jańaryp, kelýshilerge qolaıly jaǵdaı jasaldy. Memorıaldyq keshen qorshalyp, alań ishine tósemtas tóseldi. Jaryq shamdary ornatylyp, jasyl jelek otyrǵyzyldy. Eski sýarý qubyry tekserilip, jańa jańbyrlatyp sýarý júıesi ornatyldy. Sóıtip, jańarǵan alań elimizdiń tarıhyna taǵzym etýge arnalǵan rýhanı orynǵa aınaldy.
Erden kóshesindegi alleıanyń uzyndyǵy 250 metr, Qalmaǵambe-tov kóshesinen «Januıa» dúkenine deıingi aralyqty alyp jatyr. Abattandyrý barysynda 120 tal egilgen. Ústel tennısi, balalar oıyn keshenderi, átkenshekter, sporttyq trenajerler, zamanaýı oryndyqtar qoıylǵan. Jumystardy «Kozmodrom» JShS atqaryp shyqqan.
Qalanyń ortalyq alańy da abattandyrylǵan. Alańdaǵy saǵat stellasynyń jaıaý júrginshiler júretin eki qaptalyna eki sýburqaq ornatylyp, jumys istemeıtin eski sýburqaq alynyp tastaldy. «Ýnıversam» dúkeni aldyndaǵy alleıa, «Jastar» saıabaǵy kógaldandyryldy, jaıaý júrginshiler jolyna tósemtas tóseldi. Mańaıy sándik elementtermen bezendirilip, oryndyqtar men qoqys jáshikteri qoıyldy. Jaıaý adam júretin jol boıyna jaryq júıesi ornatyldy. Taldardy kútýge tamshylatyp sýarý júıesi tartyldy. Aldaǵy ýaqytta saıabaqtyń ortasyna qoıylǵan jáshikterge gúl egiledi.
О́kinishke qaraı, qalada jańadan salynǵan aýladaǵy balalar oıyn alańynyń jabdyǵyn syndyrý, saıabaqtaǵy shamdardy urlaý, qoqysty kez kelgen jerge tastap ketý oqıǵalary azaımaı tur. Osyǵan oraı aýlalardyń tazalyǵyn, tynyshtyǵyn saqtaý maqsatynda 50-ge jýyq jańa beınekameralar ornatyldy. Endi árbir aýla – zamanaýı tehnologııanyń qyraǵy nazarynda. Bul baqylaý qatty turmystyq qaldyqtardy laqtyryp ketken turǵyndardy áshkereleýge, tazalyqty saqtaýǵa, qaýipsizdikti arttyrýǵa yqpal etedi. Kúmándi áreketterdi anyqtap, der kezinde eskertý jasaýǵa múmkindik beredi.
Ulytaý oblysy,
Sátbaev qalasy