Prezıdent Qasym-Jomart Toqaev Qazaqstan men Iran tarıhynan ortaq derekter keltirdi. Bul qoljazbalardyń kóshirmelerin búgin Iran delegasııasy elimizge alyp kelgen, dep habarlaıdy Egemen.kz.
Memleket basshysy Uly Jibek joly Qazaqstan men Iran dalasy arqyly ótkenin eske saldy. Uly Jibek joly tehnologııanyń, dinniń taralýyna, sondaı-aq mádenı-rýhanı qatynastyń tereńdeýine yqpal etti.
«Iran muraǵattarynda Qazaq handyǵynyń jáne qazaqtyń jaýjúrek halyq ekeni týraly jazbalar saqtalǵan. Táýke han men shah Sultan Hýseın arasynda tyǵyz qarym-qatynas ornaǵan. Eki el ókilderi Máskeýde kezdesip, Iran elshisi qazaq dalasyna saparmen keldi degen tarıhı málimetter bar eken. Ábilqaıyr han Nádir shahqa elshi jiberip, baılanysty damytýǵa nıet bildirgen. Túrkistandaǵy Áziret sultan kesenesindegi Taıqazan Iran sheberi Ábdelazız Sharafýddın Tebrızıdiń sheberhanasynda jasalǵan», dedi Prezıdent.
Qazaq tilinde parsy sózderi kóp. Ǵalymdar tildik qorymyzdaǵy parsy sózderiniń úlesi 4 paıyz dep sanaıdy. Olardyń arasynda: astana, paıda, kórpe, dáýren, dári, dárýmen, aýla, oraza jáne taǵy basqa sózder bar eken.
«Búginde Irannyń soltústigindegi Gúlstan provınsııasynyń Gorgan, Bandar-Túrikmen jáne Kúmbed-Kavýs qalalarynda 5 myńnan astam qazaqtar turady. Fırdoýsıdyń «Shahnamasy» men onyń keıipkerleri Turan halyqtaryna da jaqyn. Qazaqtyń uly aqyny Abaı Fırdoýsı, Hafez, Saadı sııaqty parsy shaıyrlarynyń shyǵarmalarymen tanys bolǵan. Iran delegasııasy ákelgen kóne qoljazbalardyń kóshirmeleri XVIII ǵasyrdaǵy qazaq tarıhy men mádenıetine arnalǵan. Usynylǵan 27 qoljazbada Qazaq handyǵynyń áleýmettik-ekonomıkalyq ahýaly, kórshi eldermen qarym-qatynasy, aımaqtaǵy básekelestik, Túrkistannyń saıası-ekonomıkalyq jaǵdaıy, Reseı patshalyǵynyń qazaq aımaqtary men handyqtaryna qatysty áreketteri týraly saraptamalar bar. Sondaı-aq qazaq dalasynda kómir, temir, mys, qorǵasyn jáne bırıýza kenishteriniń tabylyp, olardy óndirý máselesi sıpattalǵan. О́te qyzyqty derekter bar, Sizge kóp raqmet, Prezıdent myrza», dedi Qasym-Jomart Toqaev.
Búgin Astanaǵa Iran Islam Respýblıkasynyń Prezıdenti Masýd Pezeshkıan resmı saparmen keldi. Sapar barysynda taraptar joǵary deńgeıdegi kelissózder júrgizip, saýda-ekonomıkalyq, kólik-logıstıka jáne mádenı-gýmanıtarlyq salalardaǵy qazaq-ıran yntymaqtastyǵyn odan ári nyǵaıtý máselelerin talqylaıdy.