Búgin Aqordada ótken saltanatty jıynda Qasym-Jomart Toqaev energetıka salasy mamandaryn kásibı merekesimen quttyqtady. Memleket basshysy óz sózinde Qazaqstan baı kómir qoryn durys paıdalaný kerek ekenin atap ótti, dep jazady Egemen.kz.
Prezıdenttiń pikirinshe, Qazaqstannyń tabıǵı resýrstaryn jáne óndiristik áleýetin eskersek, biz elektr qýatyn basqa elderden satyp almaýymyz kerek.
«Túptep kelgende, bul – ulttyq qaýipsizdik máselesi. Budan bólek, elimizdiń zor energetıkalyq múmkindigin tıimdi qoldaný qajet. Mysaly, Qazaqstan – kómirge baı el. Jyl saıyn 110 mıllıon tonnadan astam kómir óndiriledi. Osy strategııalyq artyqshylyqty durys paıdalanǵan jón. Biz zamanaýı úlgidegi «taza kómir» tehnologııasyna tezirek kóshýimiz kerek. Sol arqyly kómir stansııalarynyń tıimdiligin arttyra túsemiz. Budan bólek, Kýrchatov qalasynda jylý elektr stansııasyn, Kókshetaý, Semeı, О́skemen qalalarynda jylý elektr ortalyqtaryn salý qajet. Osy nysandardyń barlyǵyna «taza kómir» tehnologııasyn engizý kerek. Shyndyǵyn aıtsaq, bul jobalardyń júzege asýy ábden sozylyp ketti. Endi ary qaraı kútýge bolmaıdy», dedi Qasym-Jomart Toqaev. Memleket jańartylatyn energııa kózderin damytýǵa da tıisti kóńil bólinip jatqanyn jetkizdi. «Elimizdegi kómir qory – shamamen 33 mıllıard tonna. Soǵan qaramastan, biz jańartylatyn qýat kózderin damytýǵa basa nazar aýdaryp otyrmyz. Sońǵy 5 jylda osy salaǵa 2,5 mıllıard dollarǵa jýyq ınvestısııa salyndy. Sonyń nátıjesinde energetıka sektoryndaǵy jańartylatyn qýat kózderiniń úlesi 7 paıyzdan asty. Ekologııalyq turǵydan taza energııa óndirisin odan ári damytý úshin álemdik eń úzdik kompanııalarmen áriptestik ornattyq», dedi Prezıdent.