Premer-mınıstr Oljas Bektenov Memleket basshysynyń medısınalyq qyzmetterdiń sapasyn arttyrý boıynsha qoıǵan mindetteri sheńberinde densaýlyq saqtaý salasyn sıfrlandyrý máselesi boıynsha keńes ótkizdi, dep habarlaıdy Egemen.kz Úkimettiń baspasóz qzymetine silteme jasap.
Onda Densaýlyq saqtaý mınıstrliginiń Áleýmettik medısınalyq saqtandyrý qorynyń qyzmetin jetildirýge jáne sıfrlyq transformasııasyna qatysty tásilderi qaraldy. Halyqqa MÁMS sheńberinde kórsetiletin medısınalyq kómektiń qoljetimdiligi men sapasyn arttyrý boıynsha júrgizilip jatqan jumystarǵa nazar aýdaryldy.
Qazaqstanda mindetti áleýmettik medısınalyq saqtandyrý júıesimen shamamen 17 mln adam qamtylǵan, onyń 12 mln-ǵa jýyǵy jeńildikke ıe sanattarǵa jatady. Densaýlyq saqtaý mınıstri Aqmaral Álnazarova MÁMS qarajatynyń jıyntyq kólemi 6 jyl ishinde 6,8 trln teńgeden asqanyn baıandady, onyń 2 trln teńgesi – azamattardyń jeńildikke ıe sanattary úshin berilgen memlekettik jarnalar. Tek bıyldyń ózinde ǵana osy maqsattarǵa 1,4 trln teńge aýdarylǵan.
Jıynǵa qatysýshylar mindetti áleýmettik saqtandyrý paketi 2026 jyldyń 1 qańtarynan bastap keńeıtiletinine baılanysty sıfrlyq tetikterdi engizý arqyly qadaǵalaýdy kúsheıte túsý jáne júıeniń ashyqtyǵy máselelerin talqylady. Keler jyldan bastap halyqty mindetti áleýmettik medısınalyq saqtandyrýmen qamtý aıtarlyqtaı keńeımek. Tıisti zańnamalyq ózgerister jańa jyldan bastap kúshine enedi.
Búginde Qazaqstanda medısınalyq kómektiń 92%-y avtomatty túrde júzege asyrylady. 2026 jyldyń sońyna deıin ony 100%-ǵa deıin jetkizý josparlanyp otyr, bul adamı faktordy tolyǵymen alyp tastaýǵa múmkindik beredi.
Odan bólek satyp alý, medısınalyq qyzmetterge aqy tóleý sııaqty basqa da negizgi bıznes-prosester sıfrlandyryldy. Qordyń aqparattyq júıesin Densaýlyq saqtaý, Eńbek jáne halyqty áleýmettik qorǵaý mınıstrlikteri jáne eGov júıelerimen ıntegrasııalaý jeńildikke ıe sanattar boıynsha derekterdiń avtomatty túrde jańartylýyn qamtamasyz etti jáne medısınalyq saqtandyrý júıesi jarnalaryn esepke alýdyń dáldigin arttyrdy.
Bıyl halyqtyń medısınalyq qyzmetter kólemine naqty qajettiligin esepteýdi eskere otyryp, josparlaý qaǵıdalaryn, ádisteri men tásilderin bekitý mańyzdy qadam boldy. Kelesi jyly josparlaýdyń barlyq prosesin sıfrlandyrý aıaqtalady, bul esepteýlerdi tek burynǵy derekter negizinde ǵana emes, sonymen qatar kórsetilgen medısınalyq kómektiń naqty kólemin jáne boljamdardy eskere otyryp júzege asyrýǵa múmkindik beredi.
2025 jyldyń 1 shildesinen beri medısınalyq qyzmetterdiń sapasyna monıtorıng jasaý jáne aqy tóleý biryńǵaı sıfrlyq kontýrǵa biriktirilgen. Jańa modýl tólem qujattarynyń sanyn 9-dan 3-ke deıin qysqartty jáne 1S býhgalterııamen úzdiksiz ıntegrasııany qamtamasyz etti. Sonymen birge júıeniń «álsiz tustary» da anyqtaldy. Yqtımal táýekelder Densaýlyq saqtaý mınıstrliginiń baqylaýynda, olar sıfrlyq quraldardy engizý arqyly joıylady.
Medısınalyq uıymdarda Face ID júıesi engizilýde, bul búginde medısınalyq mekemeler tarapynan tirkeýler sanyn 7%-ǵa tómendetýge jáne bıýdjet qarajatynyń shamamen 10,5 mlrd teńgesin únemdeýge múmkindik berdi.
Kelesi jyly medısınalyq qyzmetterdi bólý úshin reıtıngtik baǵany esepteý ındıkatorlaryn tolyq sıfrlandyrý josparlanyp jatyr. Sonyń nátıjesinde medısınalyq kómektiń joǵary sapasy men qoljetimdiligin qamtamasyz ete alǵan jetkizýshiler qarjylandyrý múmkindigine ıe bolmaq. 2026 jyly medısınalyq derekterdiń biryńǵaı qoımasyn qalyptastyrý jónindegi jumystyń aıaqtalýy kórsetiletin medısınalyq kómekti josparlaý men sapasyn jaqsartýǵa áser etedi.
Halyqqa arnalǵan dári-dármekterdi josparlaý men berý tıimdiligi máselelerine bólek nazar aýdaryldy. Klınıkalyq hattamalardy sıfrlandyrý jáne birlesip tóleý tetikterin engizý boıynsha kezeń-kezeńmen jumystar júrgizilip jatyr, bul em alýshylardy qajetti preparattarmen qamtamasyz etý úderisterin ońtaılandyrýǵa múmkindik beredi.
«Bizdiń baǵyt – kórsetiletin medısınalyq qyzmetterdiń sapasyn únemi jaqsarta otyryp, qoljetimdiligin arttyrý. Sıfrlandyrýdyń alǵashqy nátıjelerin qazirdiń ózinde kórip otyrmyz. Ozyq tehnologııalardy qarqyndy engizýdi jalǵastyrý qajet. Prosesterdi avtomattandyrý medısınalyq personaldy bıýrokratııalyq rásimderden bosatyp qana qoımaı, emdeý men dári-dármekke bólingen qarajattyń jumsalýynyń ashyqtyǵyn qamtamasyz etedi. Sol kezde azamattar da, dárigerler de, memleket te reformalardyń nátıjelerin aıqyn kóretin bolady», dedi Oljas Bektenov.
Jıyn qorytyndysy boıynsha Premer-mınıstr Densaýlyq saqtaý, Jasandy ıntellekt jáne sıfrlyq damý mınıstrlikterine prosesterdi sıfrlandyrý jumysyn jandandyrýdy tapsyrdy. Qarjy mınıstrligi densaýlyq saqtaý júıesinde qarjylyq tártipti kúsheıtý jóninde sharalar qabyldaıdy.