Qazaqstan aýmaǵynan sıyr etin áketýge qatysty buryn engizilgen shekteýlerdiń merzimi uzartylýy múmkin. Aýyl sharýashylyǵy mınıstrligi «Iri qara mal etin (sıyr etin) Qazaqstan Respýblıkasynyń aýmaǵynan áketýdiń keıbir máseleleri týraly» buıryq jobasyn daıyndady, dep habarlaıdy Egemen.kz.
Qujatqa sáıkes, Qazaqstan aýmaǵynan úshinshi elderge jáne Eýrazııalyq ekonomıkalyq odaq (EAEO) elderine iri qara mal etin áketýge alty aı merzimge sandyq shekteýler (kvotalar) engizý qarastyrylǵan.
Bul sharalar eldiń azyq-túlik qaýipsizdigin qamtamasyz etý, mal sharýashylyǵy ónimderin qaıta óńdeýdi damytý, sondaı-aq sıyr eti baǵasyn turaqtandyrý maqsatynda qabyldanyp otyr.
Atalǵan buıryq jobasy «Ashyq NQA» saıtynda jarııalanǵan jáne 2025 jyldyń 24 jeltoqsanyna deıin qoǵamdyq talqylaýǵa ashyq bolady.
Eske salsaq, buǵan deıin Qazaqstanda 2025 jyldyń 31 jeltoqsanyna deıin úshinshi elderge jáne EAEO elderine 13 myń tonna kóleminde sıyr etin (jańa, tońazytylǵan nemese muzdatylǵan) áketýge sandyq shekteýler (kvotalar) engizilgen bolatyn.