Áleýmettik jelide qyzý talqyǵa túsip, turǵyndardyń narazylyǵyn týdyrǵan Aıaz ata men Aqshaqar músinderi Stepnogrsk ortalyq alańynan alynyp tastaldy. Jergilikti bılik merekelik bezendirýdi qaıta jasaýǵa ýáde berdi, dep habarlaıdy Egemen.kz
Stepnogorsk qalasynyń «Qajymuqan» alańynda paıda bolǵan Aıaz ata men Aqshaqardyń beınesin turǵyndar «talǵamsyz ári qorqynyshty» dep aıyptady.
Qalalyq máslıhat depýtattary bul jaǵdaıǵa qatysty túsinikteme berdi. Belgili bolǵandaı, bıyl alańdy bezendirýge bıýdjetten aqsha jumsalmaǵan. Músinderdi qalalyq kásiporyndar men uıymdar óz qarajaty esebinen, «óz bastamamyz» dep ornatqan eken. Alaıda, kásiporyndardyń bul «syıy» estetıkalyq normalarǵa múldem saı kelmeı qaldy.
«Bul nysandardy daıyndaýǵa Stepnogorsk bıýdjetinen bir tıyn da baǵyttalǵan joq. Biraq ornatylǵan fıgýralardyń syrtqy kelbeti turǵyndardyń oryndy synyna ushyrady», delingen habarlamada.
Qoǵamdyq reaksııanyń tym qarqyndy bolýyna baılanysty, bılik músinderdi tez arada demontajdaý týraly sheshim qabyldady. Qazirgi ýaqytta alańdy talapqa saı bezendirý jumystary qaıta qolǵa alyndy. Depýtattar halyqtan keshirim suraı otyryp, endigi bezendirý jumystarynda turǵyndardyń talǵamy men eskertýleri basty nazarda bolatynyn jetkizdi.