Batys Qazaqstan oblysy, Oral qalasynda Keńes Odaǵynyń batyry, Halyq qaharmany Baýyrjan Momyshulynyń týǵanyna 115 jyl tolýyna oraı «Batyr Baýyrjan:bolmys pen bıiktik» atty patrıottyq forým ótti, dep habarlaıdy Egemen.kz.
Forýmǵa oblystyń ár túkpirinen batyr esimin ıelenip júrgen 115 Baýyrjan arnaıy shaqyrylǵan eken. AMANAT partııasynyń oblystyq fılıaly uıymdastyrǵan is-sharaǵa sondaı-aq Batys Qazaqstan oblysynyń ákimi Narıman Tóreǵalıev, áskerı bólim sarbazdary, sportshylar qatysty. Forým barysynda batyr Baýyrjannyń ómir joly baıandalǵan teatrlandyrylǵan qoıylymdar kórsetildi.
«Forýmnyń negizgi maqsaty – Baýyrjan Momyshulynyń erlikke toly ómiri men ónegeli murasyn nasıhattaý, jastar arasynda otansúıgishtik rýhty, elge qyzmet etý qundylyqtaryn qalyptastyrý, otbasydaǵy ákeniń róli men tárbıesiniń mańyzdylyǵyn dáripteý, ulttyq rýh pen tarıhı sanany nyǵaıtý. Baýyrjan Momyshuly – tek maıdan dalasynyń qaharmany ǵana emes, ult rýhyn oıatqan uly tulǵa, erlik pen eldiktiń, namys pen parasattyń máńgilik úlgisi. Onyń batyrlyǵy – tarıh qoınaýynda qattaýly, al ósıeti – halyq jadynda máńgi saqtaýly» deıdi partııanyń oblystyq fılıaly tóraǵasy Murat Muqaev.
Forým kezinde ár salada úzdik shyqqan Baýyrjan esimdi birqatar azamatqa belsendi qyzmeti úshin Batys Qazaqstan oblysy ákiminiń atynan Alǵys hat tabystaldy.
Batys Qazaqstan oblysy