«Samuryq-Qazyna» qory 2025 jyldy qorytyndylap, negizgi kórsetkishter men atqarylǵan jumystardyń nátıjelerin jarııalady. О́tken jyl Ulttyq ál-aýqat qory úshin qarjy kórsetkishteriniń ósýimen, iri ınvestısııalyq jobalarmen, halyqaralyq seriktestiktiń nyǵaıýymen, áleýmettik qoldaýdyń artýymen erekshelendi.
Investısııalyq serpin
Qor basshysy Nurlan Jaqypovtyń aıtýynsha, energııa tasymaldaýshylar naryǵyndaǵy baǵanyń qubylmalylyǵyna, syrtqy ekonomıkalyq jaǵdaılardyń kúrdeli bolýyna qaramastan «Samuryq-Qazyna» toby negizgi qarjylyq kórsetkishter boıynsha oń dınamıka kórsetti. Jyl qorytyndysynda top aktıvteri shamamen 45 trln teńgege jetedi dep boljanyp otyr. Bul 2024 jylmen salystyrǵanda shamamen 10%-ǵa joǵary. Sondaı-aq, boljam boıynsha, kiris kólemi 18 trln teńgeden asyp, byltyrǵy deńgeıden 12%-ǵa artady. Taza paıda 2 trln teńgeden asýy múmkin.
Búginde «Samuryq-Qazyna» tobynyń ınvestısııalyq portfelinde jalpy quny shamamen 52 trln teńge bolatyn 130-dan astam joba bar. Bul jobalar munaı-gaz hımııasy, energetıka, logıstıka, kommýnıkasııalar syndy ekonomıkanyń strategııalyq mańyzdy salalarynda júzege asyrylyp jatyr.
2025 jyly sý, gaz tartý, energetıka, logıstıka, «taza» energııa salalarynda jalpy quny 1,1 trln teńgeden asatyn 9 iri ınvestısııalyq joba aıaqtaldy. Atap aıtqanda:
Kendirli aýylynda táýligine 50 000 m³ sý tushytatyn zaýyttyń qurylysy aıaqtaldy. Sóıtip Jańaózen qalasy men Mańǵystaý oblysynyń turǵyndary úshin aýyzsý tapshylyǵy máselesi sheshildi; Caspi Bitum zaýytynyń qýaty 1,5 esege artyp, jylyna 750 myń tonnaǵa jetti. Bul ishki naryqty turaqty túrde jol bıtýmymen qamtamasyz etedi; «Taldyqorǵan – Úsharal» gaz qubyry salyndy. Mańyzdy jobanyń arqasynda 134 myń adam turatyn 84 eldi mekenge kógildir otyn tartyldy. Bul turǵyndardyń ómirin jeńildetip, óńirdiń ekologııalyq ahýalyn jaqsartýǵa sep boldy; Jańaózende qýaty 50 MVt bolatyn kún elektr stansasy iske qosylyp, óńirde «taza» elektr energııasyn óndirý kólemi artty; Logıstıkany damytý maqsatynda Aqtaýda jańa konteınerlik hab ashyldy, Almatyda Zhetysu termınaly jumysyn bastady. Bul respýblıkanyń tranzıttik áleýetin arttyrýǵa múmkindik beredi.
Halyqaralyq yntymaqtastyq nyǵaıyp keledi
2025 jyly qordyń halyqaralyq arenadaǵy róli nyǵaıyp, sheteldik seriktesteriniń qatary birshama tolyqty. Qazaqstan–Qytaı iskerlik keńesi aıasynda jalpy somasy 15 mlrd dollardan asatyn 70-ten astam kommersııalyq qujatqa qol qoıyldy.
Memleket basshysynyń AQSh-qa resmı sapary barysynda qor uıymdary birqatar iri kelisim jasasty. Atap aıtqanda, «Boeing» kompanııasymen 18 áýe kemesin satyp alý jóninde kelisimshartqa qol qoıylsa, «Qazaqstan temir joly» «Wabtec» kompanııasymen 300 júk lokomotıvin jetkizý, olarǵa servıstik qyzmet kórsetý týraly ýaǵdalasty. Al «Qazaqtelekom» «Amazon Kuiper» kompanııasymen elimizde spýtnıktik baılanys qyzmetterin iske qosýǵa kelisti.
Sonymen qatar Iordanııa, Mońǵolııa, Rýanda elderimen yntymaqtastyq jóninde kelisimder ornatyldy. Qazaqstan Prezıdentiniń Japonııaǵa resmı sapary aıasynda «Samuryq-Qazyna» tobynyń kompanııalary energetıka, jańartylatyn energııa kózderi, sıfrlandyrý, taý-ken ónerkásibi, kólik salalarynda jalpy somasy 1,5 mlrd dollardy quraıtyn 9 qujatqa qol qoıdy.
Halyqaralyq seriktestermen birlesken jobalar el ekonomıkasyn nyǵaıtýǵa, jańa jumys oryndaryn ashyp, óndiris pen ónerkásip salasyn damytýǵa múmkindik beredi.
Otandyq bıznesti qoldaý
Otandyq taýar óndirýshilerdi qoldaý qor qyzmetiniń basym baǵyttarynyń biri bolyp qala beredi. «Samuryq-Qazynanyń» otandyq kásiporyndardan satyp alǵan taýarlar men qyzmetter kólemi 2023 jylǵy 625 mlrd teńgeden 2025 jyly 2 trln teńgege deıin ósti. Osylaısha, qordyń satyp alý júıesi Ekonomıkalyq yntymaqtastyq pen damý uıymy, Dúnıejúzilik bank, Eýropalyq qaıta qurý jáne damý banki, Azııa damý banki syndy álemdik bedeldi qarjy uıymdary tarapynan halyqaralyq ozyq standarttarǵa saı dep tanyldy.
Áleýmettik jaýapkershilik
Qor qyzmetindegi basym baǵyttardyń biri – áleýmettik jaýapkershilik. Sońǵy eki jylda kompanııalar toby áleýmettik jobalar men qaıyrymdylyqqa shamamen 1,5 trln teńge bólgen. Bul qarajat medısına mekemeleri men mádenı nysandardy salýǵa, ınfraqurylym men sportty damytýǵa, ınklıýzıvti bilim berýdi qoldaýǵa jumsaldy.
Jyl sońyna deıin elimizde qordyń qoldaýymen 55-ońaltý ortalyǵy ashylmaq. Búginde 1,5 myń balaǵa arnalǵan 31 ınklıýzııa kabıneti jumys istep tur. Sondaı-aq el kóleminde 740 myń turǵyndy qamtıtyn 18 sport kesheni halyq ıgiligine berildi. Sonymen qatar Jumysshy mamandyqtar jylynda 10 myńnan astam stýdent Qor tobynyń óndiristik nysandarynda dýaldy oqytý men tájirıbeden ótip jatyr.
Ekologııalyq baǵyttaǵy «Taza Qazaqstan» jobasy aıasynda 5,8 mln túp aǵash otyrǵyzyldy. «Salamatty Qazaqstan» medısınalyq poıyzy elimizdiń shalǵaıdaǵy aýyl-aımaǵyn aralap, 100 myńnan astam adam medısınalyq jáne quqyqtyq qyzmetterdi tegin aldy. Jalpy alǵanda, «Samuryq-Qazyna» jyl saıyn 1 mıllıondaı adamǵa qoldaý kórsetedi.
Jasandy ıntellekt – basqarýdyń jańa quraly
Búginde «Samuryq-Qazyna» toby óndiris, ónerkásiptegi qaýipsizdik, tehnologııalyq úderisterde jasandy ıntellekt qoldanylatyn 62 jobany iske asyryp otyr. Korporatıvtik JI-assıstentter ázirlenip, Dırektorlar keńesiniń múshesi retinde basqarýshylyq, qarjylyq materıaldardy taldaıtyn SKAI neırojelisi engizildi.
Qor aldaǵy eki jyl ishinde 70%-ǵa deıin basqarýshylyq sheshimderdi jasandy ıntellektiniń qatysýymen qabyldaýdy josparlap otyr. Osylaısha, 2026 jylǵa qaraı JI-sheshimderdi engizý esebinen EBITDA kórsetkishin 5%-ǵa arttyrý kózdelgen.
Keler jylǵa jospar
«Bıyl «Samuryq-Qazyna» toby úshin mańyzdy jetistikter jyly boldy, degenmen alǵa qoıǵan maqsattarymyz budan da aýqymdy», deıdi qor basshylyǵy. Ulttyq qor ókilderi 2026 jyly basqarýdaǵy aktıvter qunyn ári qaraı arttyryp, 50 trln teńgege jetkizýdi kózdeıdi. Sondaı-aq kelesi jyly Almatydaǵy ekinshi jylý elektr ortalyǵyn jańǵyrtý, jańa temirjoldar salý, basqa da strategııalyq bastamalardy júzege asyrý josparlanǵan.
Jansaıa QAPASQYZY