Prezıdent tapsyrmalaryn iske asyrý aıasynda Úkimet ǵylym men joǵary bilimdi damytýdyń 2025 jylǵa arnalǵan qorytyndysyn shyǵardy. Bul týraly Úkimettiń 2025 jylǵy qyzmetiniń qorytyndylary sheńberinde ótken brıfıng barysynda aıtyldy, dep habarlaıdy Egemen.kz.
Atalǵan kezeńde Ǵylym jáne joǵary bilim mınıstrligi basshylyǵy buqaralyq aqparat quraldarynyń ókilderimen birqatar kezdesýler ótkizdi. Solardyń birinde ǵylym jáne joǵary bilim vıse-mınıstri Gúlzat Kóbenova 2025-2026 oqý jylyna kadr daıarlaýǵa bólingen memlekettik bilim granttary týraly málimet berdi.
Vedomstvo dereginshe, aldaǵy oqý jylyna barlyǵy 93 232 bilim granty bólingen. Onyń ishinde 77 084 grant bakalavrıatqa, 13 229 grant magıstratýraǵa jáne 2 919 grant doktorantýraǵa qarastyrylǵan.
Joǵary bilimniń qoljetimdiligin arttyrý maqsatynda memleket, qoǵamdyq qorlar, ata-analar men bankterdiń qatysýymen «Keleshek» biryńǵaı jınaqtaý júıesi engizilgen. Bul júıe 5 jastan bastap bilim berý kapıtalyn qalyptastyrýdy kózdeıdi. Memleket tarapynan 60 aılyq eseptik kórsetkish mólsherinde birjolǵy bastapqy kapıtal berý qarastyrylǵan. Jınaqtalǵan qarajatty bolashaqta joǵary bilim alýǵa nemese turǵyn úı jaǵdaıyn jaqsartýǵa baǵyttaýǵa múmkindik bar. Qazirgi tańda júıe aıasynda 133,9 myńǵa jýyq salym esepshoty ashylǵan.
Sonymen qatar bakalavrıat stýdentterine arnalǵan shákirtaqy mólsheri sońǵy jyldary edáýir artqan. Atap aıtqanda, 2025 jyly shákirtaqy 52 372 teńgeni, al pedagogıkalyq mamandyqtar boıynsha 84 000 teńgeni qurady. Bul kórsetkish 2020 jylmen salystyrǵanda eki eseden astam ósimdi kórsetedi.
Aıta keteıik, qabyldanyp jatqan sharalar Memleket basshysynyń ǵylym men joǵary bilim salasyn damytý, kadr áleýetin kúsheıtý jáne jastarǵa teń múmkindik jasaý jónindegi tapsyrmalaryn júıeli túrde iske asyrýǵa baǵyttalǵan.