Qarjy mınıstrliginiń málimetine súıensek, bıylǵy 11 aıdyń qorytyndysy boıynsha áýejaıdan jańa temirjol vokzalyna deıingi LRT ýchaskesiniń qurylysyna respýblıkalyq bıýdjetten 329,6 mlrd teńge bólingen. Bul ótken jylmen salystyrǵanda qarjylandyrýdyń aıtarlyqtaı belsendi júrip jatqanyn kórsetedi: máselen, 2024 jyly bul maqsatqa nebári 28,4 mlrd teńge, al 2023 jyly 52,4 mlrd teńge jumsalǵan bolatyn. Barlyq jaǵdaıda qarajat Ulttyq qordan maqsatty transfertter túrinde berildi.
Elordaǵa LRT-nyń taǵy eki jyljymaly quramy jetkizildi.
DataHub arnasynyń málimetinshe, respýblıkalyq bıýdjet Almaty qalasynyń relsti kólik júıesin damytýdy da qarjylandyryp otyr. Atap aıtqanda, 2025 jyly metropolıten qurylysyna 25,6 mlrd teńge bólindi. Aıta keterligi, 2024 jyly bul baǵytta eshqandaı shyǵyn qarastyrylmaǵan bolsa, 2023 jyly bólingen qarjy kólemi 9,4 mlrd teńgeni quraǵan bolatyn.Astana qalasynyń ákimi Jeńis Qasymbektiń aıtýynsha, LRT-nyń kelesi jelisi Kosshy baǵytyna qaraı salynady.
Astanadaǵy LRT jobasynyń tarıhy 2017 jyly Qytaıdyń memlekettik damý bankinen 1,5 mlrd dollar nesıe alýdan bastalǵan edi. Alaıda 2018 jyly «Astana banki» lısenzııasynan aıyrylyp, ondaǵy 208 mln dollar kólemindegi nesıe qarajaty buǵattalǵan soń, ınvestor qarjylandyrýdy toqtatty. 2019 jyly jemqorlyq daýyna baılanysty qurylys múldem toqtap, sot prosesteri bastaldy. Keıinnen Qazaqstan bıligi qytaılyq nesıeni merziminen buryn ótep tastady.
LRT qurylysy 2023 jyly tolyqtaı bıýdjet esebinen qaıta jandandy. Jobany iske qosý merzimi birneshe ret keıinge shegerilgenimen, 2025 jyldyń qyrkúıek aıynda synaq rejiminde iske qosyldy. Al jelini túpkilikti paıdalanýǵa berý 2026 jylǵa josparlanyp otyr.
LRT-nyń resmı iske qosylýyna sanaýly kúnder qaldy