Qaraǵandy oblysynyń Shet aýdanynda tótenshe jaǵdaılar qyzmeti joldan adasyp ketken eki adamdy aman-esen tapty, dep habarlaıdy Egemen.kz
TJM málimetinshe, 1987 jáne 1990 jyly týǵan azamattar tańerteń Sasyqbulaq qystaýynan Aqsý-Aıýly aýylyna qaraı jaıaý jolǵa shyqqan, alaıda baǵytynan jańylyp, eldi mekenge jete almaǵan.
Aýa raıy men jer bederiniń kúrdeliligi olardyń baǵdarlaýyna kedergi keltirgen.
Habar túse salysymen, izdestirý jumystaryna qutqarýshylar jedel túrde jumyldyryldy. Operasııa barysynda arnaıy tehnıka; ushqyshsyz ushý apparaty (dron); bıllıngilik derekter paıdalanyldy.
Qutqarý operasııasy nátıjesinde eki adam aman-esen tabylyp, medısınalyq kómekke muqtaj bolmaǵan. Qazir olardyń jaǵdaıy qalypty.
TJM turǵyndardy qys mezgilinde alys jolǵa shyqqanda baǵytty naqtylap, baılanys quraldaryn ózimen birge alyp júrýge shaqyrady.