Iranda jeltoqsan aıynyń sońynan beri jalǵasyp jatqan jappaı narazylyqtar áli de basylar emes. El aýmaǵynda ınternettiń óshýine baılanysty oqıǵalar týraly aqparatty táýelsiz túrde rastaý qıyndap otyr, dep habarlaıdy Egemen.kz.
CNN málimetinshe, Tegeran provınsııasynyń Baharestan okrýginde Iran bıligi shamamen 100 adamdy ustaǵan. Bul – el astanasy mańyndaǵy aýdan. Ustalǵan azamattar qoǵamdyq tártipti buzdy jáne jappaı tártipsizdikter uıymdastyrdy degen aıyppen qamaýǵa alynǵan. Bul týraly Tasnim agenttigine jergilikti sheneýnikterdiń biri habarlaǵan.
Onyń aıtýynsha, ustalǵandardyń bir bóligi beıbit turǵyndar men qaýipsizdik kúshterine qarsy atys jáne sýyq qarý qoldanǵan. Alaıda naqty epızodtar boıynsha egjeı-tegjeıli málimet berilmegen.
BAQ: Irannyń rýhanı jetekshisi Máskeýge qashýdy josparlap otyr
Sonymen qatar quqyq qorǵaý uıymdary narazylyq saldary áldeqaıda aýqymdy ekenin alǵa tartyp otyr. AQSh-ta ornalasqan HRANA agenttiginiń deregine sáıkes, eki apta ishinde el boıynsha keminde 65 adam qaza tapqan. Olardyń ishinde 14 qaýipsizdik qyzmetkeri jáne 48 narazylyqqa qatysýshy bar. Ustalǵandar sany 2 300 adamnan asqan.
Al Time jýrnaly budan da qatań derekter keltiredi. Basylym densaýlyq saqtaý salasyndaǵy derekkózderge silteme jasap, qaza tapqandar sany 217 adamnan kem emes ekenin jazady. Qurbandardyń basym bóligi atys jaraqatynan kóz jumǵan. Málimet boıynsha, Tegerandaǵy alty aýrýhananyń ózinde júzdegen narazylyqqa qatysýshynyń ólimi tirkelgen, olardyń kópshiligi – jastar. Alaıda jýrnal bul aqparatty derbes rastaý múmkin bolmaǵanyn atap ótedi.
Osy jaǵdaı aıasynda saıası rıtorıka da kúsheıip keledi. Irannyń sońǵy shahynyń uly, taq murageri Reza Pehlevı narazylyq bildirýshilerdi tek mıtıngilermen shektelmeı, qalalardaǵy mańyzdy nysandardy basyp alyp, baqylaýda ustaýǵa daıyndalýǵa shaqyrdy. Al Iran bıligi buǵan deıin narazylyq aksııalaryna qatysýshylarǵa ólim jazasyn qoldaný múmkindigin joqqa shyǵarmaǵan.
Sonymen qatar buqaralyq aqparat quraldary men áleýmettik jelilerde Tegeranda tártipsizdikter kezinde ondaǵan meshittiń órtelgeni týraly málimetter tarady. Monıtorıngtik toptar el ishinde ınternettiń tolyq óshirilgenin de habarlap otyr.
Iranda ulttyq valıýtanyń quldyraýy jappaı narazylyqty kúsheıtti
AQSh-tyń prezıdenti Donald Tramp Aq úıde ótken brıfıngte Irandaǵy jaǵdaıǵa qatysty pikir bildirip, eger qaýipsizdik kúshteri demonstranttarǵa oq atsa, AQSh tarapynan jańa soqqylar jasalýy múmkin ekenin aıtty.
«Eger olar atatyn bolsa, biz de atamyz», dedi Donald Tramp.