Roza Baǵlanova atyndaǵy «Qazaqkonsert» memlekettik akademııalyq konserttik uıymynda fortepıano mýzykasynyń keshi ótti. Keshti atalǵan uıymnyń Qazaq memlekettik sımfonııalyq orkestri uıymdastyryp, kórermenge álemdik klassıkalyq mýzykanyń úzdik úlgilerin usyndy.
Konsert baǵdarlamasyna HH ǵasyr mýzykasynyń kórnekti ókilderi – Dmıtrıı Shostakovıch, Sergeı Rahmanınov, Aleksandr Skrıabınniń shyǵarmalary endi. Atap aıtqanda, D.Shostakovıchtiń №2 fortepıano konserti, S.Rahmanınovtiń 23 jáne 32-opýstarynan tańdamaly prelıýdııalar, sondaı-aq A.Skrıabınniń 2, 8 jáne 42-opýstarynan etıýdter oryndaldy.
Mýzyka keshiniń basty ereksheligi – álemge áıgili pıanıst-solısterdiń óner kórsetýi boldy. Sahnada Reseı men Bashqurtstannyń halyq ártisi, P.Chaıkovskıı atyndaǵy jáne Lıds (Ulybrıtanııa) halyqaralyq baıqaýlarynyń laýreaty Vladımır Ovchınnıkov óner kórsetti. Onyń oryndaýyndaǵy klassıkalyq hám romantıkalyq týyndylar tereń ınterpretasııasymen kórermenniń ystyq yqylasyna bólendi.
Sondaı-aq fortepıano keshinde Reseıdiń eńbek sińirgen ártisi, Gnesınder atyndaǵy Reseı mýzyka akademııasynyń professory, bedeldi halyqaralyq baıqaýlardyń jeńimpazy ári mártebeli «Steinway Artist» ataǵynyń ıegeri Iýrıı Bogdanov sahnaǵa shyqty. Oryndaýshylyq erkindigimen, aıryqsha temperamentimen erekshelenetin pıanıst A.Skrıabın shyǵarmalaryn ózindik qoltańbamen jetkizdi.
Qazaq memlekettik sımfonııalyq orkestri – elimizdiń jetekshi mýzykalyq ujymdarynyń biri. Orkestr 1991 jyly álemge áıgili skrıpkashy, Qazaqstannyń halyq ártisi, Eńbek Eri, professor, ujymnyń kórkemdik jetekshisi Aıman Musaqojaevanyń bastamasymen qurylǵan.