Ulytaý oblysynyń ákimi Dastan Ryspekov Jezqazǵan qalasyndaǵy birqatar kolledjdi aralap, oqý oryndarynyń materıaldyq-tehnıkalyq jaǵdaıy men bilim alýshylardyń tynys-tirshiligimen tanysty.
Aldymen oblys ákimi taý-ken metallýrgııalyq kolledjine baryp, ǵımarattyń qazirgi jaǵdaıyn kórdi. Nátıjesinde, atalǵan nysandy jańǵyrtý maqsatynda jobalyq-smetalyq qujattamany jedel túrde ázirleýdi, sondaı-aq jóndeý jumysynyń naqty merzimi men qarjylandyrý kózin aıqyndaýdy tapsyrdy.
Odan keıin tehnologııa jáne servıs kolledjinde boldy. Bilim ordasynyń oqý korpýsy men sport zalyna byltyr kúrdeli jóndeý jumysy bastalǵan. Aımaq basshysy bıyldan qaldyrmaı jataqhanaǵa da kúrdeli jóndeý jumysyn júrgizý úshin jobalyq-smetalyq qujattamasyn daıyndaý mindetin júktedi.
Sonymen qatar oblys ákimi gýmanıtarlyq kolledj ǵımaratyna da bas suqty. О́ńir basshysy bilim ordasyndaǵy sport zaldyń talapqa saı kelmeıtinin eskerte otyryp, qosymsha ǵımarat salýdy tapsyrdy.
Aımaq basshysy bilim nysandaryn aralaý barysynda stýdentterdiń qaýipsiz ári jaıly jaǵdaıda sapaly bilim alýy – aımaqtyń adamı kapıtalyn damytýdaǵy basym baǵyttyń biri ekenin atap ótti. Osyǵan baılanysty bilim berý nysandary zamanaýı talaptarǵa tolyq saı bolýy tıis ekenin jetkizdi.
Ulytaý oblysy