Astanada erler arasyndaǵy Devıs kýboginiń I Álemdik tobyndaǵy pleı-off saıysynda elimizdiń quramasy Monako quramasymen sheberlik baıqasty.
Alǵashqy bolyp kortqa Aleksandr Býblık pen Ýgo Nısha shyqty. Elimizdiń birinshi raketkasy qarsylasyn bas kótertpeı utty – 6:0, 6:3. Aleksandr Shevchenko men Valentın Vashero arasyndaǵy básekede de dál sondaı esep tirkeldi. Biraq bul joly fransýz tennısshisi basymdyq tanytty. Kelesi kúni Aleksandr Býblık pen Beıbit Juqaev Romeın Arneodo/Ýgo Nısh jubymen kúsh synasty. Bul oıynnyń tartysty ótkeni sonshalyq, barlyq set taı-breıkke deıin ulasty. Birinshi sette jerlesterimiz jeńiske jetse, qalǵan ekeýi qonaqtardyń paıdasynan sheshildi – 7:6, 6:7, 6:7.
Sheshýshi saıys Býblık pen Vashero arasynda ótti. ATR reıtınginde 25-orynda turǵan Monakonyń marqasqasy byltyr kúzde Shanhaıda uıymdastyrylǵan «Masters» týrnırinde elimizdiń eń úzdik oıynshysyn oıda-joqta súrindirgen edi. Bul joly da Vashero sol jeńistiń kezdeısoq emestigin dáleldedi. Esep – 7:6, 7:6. Sóıtip, Monakodan 1:3 esebimen jeńilip, myqtylar sanatyna qosyla almaǵan jerlesterimiz kelesi jyly Devıs kýboginiń II Álemdik tobynda óner kórsetetin boldy.