Qyrǵyzstannyń burynǵy joǵary laýazymdy tulǵasy Qamchybek Tashıev ózine qatysty kadrlyq sheshimnen keıin úndeý jasady. Onyń atynan jazylǵan mátin áleýmettik jelilerde jaqtastary arqyly jarııalanǵan, dep jazady Egemen.kz.
Úndeýde Qamchybek Tashıev qyzmetten bosatylýy ózine «kútpegen jaǵdaı» bolǵanyn atap ótedi. Aıtýynsha, ol buǵan deıin jasalǵan operasııadan keıin tekserýden ótý úshin prezıdenttiń ruqsatymen shetelge shyqqan. Sol ýaqytta qabyldanǵan sheshim tosyn bolǵanymen, memleket basshysynyń sheshimi qandaı jaǵdaıda da oryndalýǵa tıis ekenin basa aıtqan.
«Men memleketimizge, halqymyzǵa jáne prezıdentke adal qyzmet ettim jáne muny maqtan tutamyn. О́kinetin bir ǵana jaıt bar, jeke qurammen qoshtasýǵa múmkindik berilmedi. Memlekettik ulttyq qaýipsizdik komıtetiniń árbir qyzmetkerine alǵys aıtyp, tabys tileımin», delingen úndeýde.
Sondaı-aq Qamchybek Tashıev azamattardy zańdy saqtaýǵa, arandatýshylyqqa jol bermeýge shaqyryp, eldegi turaqtylyq pen qoǵamdyq tynyshtyqtyń mańyzyn atap ótken.
Eske salsaq, buǵan deıin Qamchybek Tashıev Qyrǵyz Respýblıkasynyń mınıstrler kabıneti tóraǵasynyń orynbasary jáne Memlekettik ulttyq qaýipsizdik komıtetiniń tóraǵasy qyzmetterinen bosatylǵan edi.