Foto: Aqorda
Ashat Hasenovtiń aıtýynsha, byltyr Qytaıdyń CNOOC jáne Sinopec kompanııalarymen Atyraý oblysyndaǵy Jylyoı jáne Batys Qazaqstan oblysyndaǵy Berezovskıı jobalary boıynsha jer qoınaýyn paıdalaný kelisimsharttary jasaldy. Turkish Petroleum Corporation, BP, Horvat kómirsýtegi agenttigi sekildi iri halyqaralyq kásiporyndar elimizdegi perspektıvti ýchaskelerdi zertteýde.
Prezıdentke «QazMunaıGaz» kompanııasy buǵan deıin keń kólemde zerttelmegen jáne jiti kóńil bólinbegen aýmaqtarda geologııalyq barlaý júrgizýge erekshe den qoıǵany jóninde baıandaldy. 2025 jyly 8 izdeý uńǵymasyn burǵylaý aıaqtaldy, al 2029 jylǵa deıin taǵy 24 izdeý uńǵymasyn burǵylaý josparlanǵan. Jalpy ınvestısııa kólemi 900 mıllıon dollardan asady.
Memleket basshysyna usynylǵan esepke sáıkes, 2025 jyldyń qorytyndysy boıynsha munaı men kondensat óndirý kólemi 26,2 mln tonnaǵa jetti. Bul – 2024 jylmen salystyrǵanda 10 paıyzǵa joǵary. Budan bólek, kógildir otyn óndirý kólemin jylyna qosymsha 2,3 mlrd tekshe metrge ulǵaıtý úshin Batys Prorva, Ortalyq О́riktaý jáne Rojkov ken oryndarynda jumys júrgizilip jatyr.
Byltyr «QazMunaıGazdyń» úsh munaı óńdeý zaýytynda 17,5 mln tonna shıkizat óńdeldi. Jeńil munaı ónimderin shyǵarý kólemi 13,6 mln tonnany qurady (2024 jylǵy kórsetkishten 1,2 mln tonnaǵa artyq).
Sondaı-aq Qasym-Jomart Toqaev munaı-gaz hımııasy men gaz óńdeý salasyndaǵy jalpy quny 15 mlrd dollardan asatyn iri ınvestısııalyq jobalardy iske asyrý barysymen tanysty. Mańǵystaý oblysynda qýaty táýligine 50 myń tekshe metr bolatyn «Kendirli» teńiz sýyn tushytý zaýyty paıdalanýǵa berildi.
Kezdesý sońynda Memleket basshysy geologııalyq barlaý jumystaryn jandandyrýǵa jáne iri ınvestısııalyq jobalardy ýaqtyly iske asyrýǵa qatysty mindet júktedi.
Eske sala keteıik, keshe Memleket basshysy Qasym-Jomart Toqaev qarý aınalymyn baqylaýdy kúsheıtetin zańǵa qol qoıdy.
