Kórmege Ǵylym jáne joǵary bilim vıse-mınıstri Gúlzat Kóbenova jáne vedomstvo ókilderi qatysty. Ǵalymdar sıfrly tehnologııalar, jasandy ıntellekt, aýyl sharýashylyǵy, nanotehnologııa, metallýrgııa, taǵam ónerkásibi jáne ózge de strategııalyq mańyzdy salalardaǵy zamanaýı ázirlemelerge qatysty 40-tan asa ınnovasııalyq jobany tanystyrdy.
Qazirgi kezde Satbayev ýnıversıtetiniń ǵalymdary óndiristik qaldyqtar men jylý elektr stansııasynan shyqqan kúlderdi paıdalana otyryp, qurylys materıaldaryn ázirlep jatyr. Prezıdent tapsyrmasyna sáıkes arnaıy tehnopark qurylyp, otandyq joǵary oqý oryndaryn biriktirgen konsorsıým quramyna Satbayev ýnıversıteti jáne elimizdegi joǵary oqý oryndary kirgen. Sonyń negizinde birlesken zertteýler jasalyp, nátıjesinde sement jáne 19 túrli qurǵaq qurylys qospalary daıyndalyp jatyr, onyń ishine kafeldi jelimder, sylaqtyń túrleri bar.
Ǵylymı jobanyń bólim jetekshisi Rýslan Erǵalıulynyń aıtýynsha, shyǵarylǵan ónimder patenttelip, naryqqa shyǵarylǵan. Joba aıasynda óndiristik qaldyqtar negizinde qurylys materıaldaryn alý maqsatynda Shymkent, Almaty, О́skemen qalalarynda óndiris oryndary ashyldy. Innovasııalyq joba aıasynda ár óndiris ornynda 20-ǵa jýyq qyzmetker, jalpy sany 100-den astam adam eńbek etedi.
Ǵalymdar kólik júrgizip kele jatyp mýzyka tyńdaý qaýipti ekenin eskertti
Kórmede sondaı-aq jerdi qashyqtyqtan zondtaý tehnologııasy arqyly ázirlengen jańa geologııalyq karta tanystyryldy. Sátbaev ýnıversıteti baspasóz qyzmetiniń dereginshe, bul jobaǵa geologtar, fızıkter, IT-mamandar jáne jerdi qashyqtan zondtaý ortalyǵynyń sarapshylary jumyldyrylǵan. Barlyǵy 30-ǵa jýyq zertteýshi qatysqan aýqymdy jumys nátıjesinde paıdaly qazbalardy barlaý men tabıǵı resýrstardy tıimdi basqarýǵa múmkindik beretin zamanaýı karta jasalǵan. Al Qorqyt Ata atyndaǵy Qyzylorda ýnıversıtetiniń ǵalymdary sýdy tazartýdyń ınnovasııalyq ádisin usyndy. Zertteýshiler kúrish qaýyzyn óńdeý arqyly belsendirilgen kómir alǵan. Osy materıaldyń kómegimen las sýdy tıimdi súzgiden ótkizip, aýyl sharýashylyǵynda qoldanýǵa jaramdy taza sý alýǵa qol jetkizgen. Bul joba sý resýrstaryn únemdeýge jáne agrarlyq sektordyń tıimdiligin arttyrýǵa baǵyttalyp otyr.
