Foto: SQO ákimdigi
Monıtorıng barysynda Shal aqyn, Ǵabıt Músirepov, Esil, Aıyrtaý, Aqjar, Ýálıhanov jáne Taıynsha aýdandary, sondaı-aq Úlken jáne Kishi Taranǵul ózen arnalary, Shaǵalaly ózeni jáne Aqmola oblysyndaǵy Sileti sý qoımasy qamtyldy.
SQO ákimi Ǵaýez Nurmuhambetovtiń aıtýynsha, Úlken Taranǵul kólinde ylǵal qory ótken jylmen salystyrǵanda shamamen 74%-ǵa azaıǵan. Esil aýdanynda qar qorynyń qarqyndy azaıýy baıqalyp otyr. Qalǵan aýdandarda táýekelder jergilikti sıpatta, erigen qar sýlary men muzdyń álsireýine baılanysty. Shaǵalaly ózeninde sý deńgeıi azdap kóterildi, biraq ótken jylmen salystyrǵanda tómen, muz jamylǵysy birtindep bosańsyp keledi.
Sý resýrstary jáne ırrıgasııa mınıstrligimen, sondaı-aq «Qazsýshar» RMK Aqmola fılıalymen birlesip qabyldanǵan sheshimge sáıkes, 28 aqpannan bastap Sileti sý qoımasynan sýdy aldyn ala jiberý bastaldy, bul sý tasqyny kezeńin qaýipsiz ótkizýge múmkindik beredi.
Mamandar boljamynsha, 25 naýryzdan bastap aýa temperatýrasynyń kóterilýine baılanysty kóktemgi úderisterdiń belsendi kezeńi bastalady. Barlyq jaýapty qyzmetter jaǵdaıdy turaqty baqylaýda ustap, kúsheıtilgen rejımde jumys istep jatyr.
