О́tken jylǵy shilde aıynda kóliktegi polısııa departamentiniń qyzmetkerleri Qaraǵandy qalasynyń 34 jastaǵy turǵynyn, kıim satý dúkenderi jelisiniń ıesi, jeke kásipkerdi esirtki zattarynyń zańsyz aınalymyna qatysy bar degen kúdikpen ustady, dep habarlaıdy Egemen.kz.
Tergeý derekterine sáıkes, kúdikti zańsyz paıda tabý maqsatynda sıntetıkalyq esirtki zattaryn qala aýmaǵynda jasyryn oryndarǵa qoıyp ketip, taratýmen aınalysqan.
«Ustaý kezinde odan jalpy salmaǵy shamamen 5 gramm bolatyn sıntetıkalyq zat salynǵan 13 oram tárkilendi», delingen IIM habarlamasynda.
Sondaı-aq tintý barysynda onyń turǵylyqty mekenjaıynan jeke tutyný úshin saqtaǵan jalpy salmaǵy 6 gramnan asatyn gashısh esirtki zaty tabylyp, tárkilendi.
Kólik polıseıleri esirtki zattaryn zańsyz ótkizý faktisi boıynsha sotqa deıingi tergeý júrgizdi. Qaraǵandy qalasynyń Qazybek bı aýdandyq sotynyń sheshimimen aıyptalýshy kináli dep tanylyp, 7 jyl merzimge bas bostandyǵynan aıyryldy.