Qasym-Jomart Toqaev sýmo sportynyń otany Japonııada zor jetistikke jetken qazaqstandyq balýan Ersin Baltaǵulmen kezdesti, dep jazady Egemen.kz.
Prezıdent sportshynyń byltyr Imperator kýbogynda «maegashıra» ataǵyn, ıaǵnı sýmo balýandarynyń eń joǵary dárejesin ıelenip, jarys qorytyndysy boıynsha «Kanto-se» (jaýyngerlik rýh) arnaıy júldesin alýymen quttyqtady.
Qasym-Jomart Toqaev atalǵan júlde tabandylyq pen qajyrly eńbektiń jemisi ekenine toqtaldy.
Sondaı-aq búginde shet memleketterde elimizdi álemge tanytyp júrgen jastarymyzdyń kóbeıip kele jatqanyn, memlekettiń talanttar men sportty qoldaýǵa erekshe kóńil bóletinin atap ótti.
«Japonııaǵa barǵan saparymda sizdi Imperatordan bastap qarapaıym halyqqa deıin bári tanıtynyn, qurmetteıtinin baıqadym. Bul – zor mártebe. Japonııada tursańyz da qazaqtyń atyn shyǵaryp, elimizdiń bedelin bıiktetip júrsiz. Sizge erekshe rızashylyǵymdy bildiremin», dedi Memleket basshysy.
Ersin Baltaǵul Prezıdentke iltıpat kórsetkeni úshin rızashylyǵyn bildirip, elimizdiń jas sportshylarymen kezdesýdi josparlap otyrǵanyn jetkizdi.
«Qazaqstannyń azamaty retinde maqsatymyz elimizdiń kók týyn 120 mıllıonnan asa halqy bar Japonııaǵa tanytý bolatyn. Osy baǵyttan taımaı, eńbek etip kelemiz. Sondaı-aq Italııadaǵy Qysqy Olımpıada oıyndarynda altyn medal ıelengen otandasymyz Mıhaıl Shaıdorovtyń aıtýly jetistigimen О́zińizdi jáne barsha qazaqstandyqtardy quttyqtaımyn», dedi Ersin Baltaǵul.
Kezdesý sońynda Qasym-Jomart Toqaev balýanǵa aldaǵy ýaqytta da halyqaralyq jarystarda joǵary nátıjelerge qol jetkizip, el abyroıyn asqaqtatýǵa jáne Qazaqstan men Japonııa arasyndaǵy dostyqty nyǵaıtýǵa úles qosa berýine tilektestik bildirdi.
Prezıdent sport salasyndaǵy eleýli eńbegi úshin sýmoshy Ersin Baltaǵuldy II dárejeli «Barys» ordenimen marapattady.
Aıta keteıik, Memleket basshysynyń Japonııaǵa issapary kezinde Ersin Baltaǵulmen kezdesken edi.