Kólik salasyndaǵy keleli ister

О́z sózinde Premer-mınıstrdiń birinshi orynbasary R.Sklıar alqa otyrysy elimizdegi saıası transformasııa men jańa Konstıtýsııany ázirleý aıasynda ótip jatqanyn tilge tıek etti.

«Jańa Konstıtýsııa jobasy qoǵamnyń belsendiligi men saıası má­denıetin arttyrý sharalaryn kóz­deıtin, memleketimizdiń damýynyń sapalyq jańa deńgeıin belgileıtin tujyrymdamalyq jańa qujat bolyp sanalady», dedi R.Sklıar.

Jıynda qatysýshylar Memle­ket basshysynyń tapsyrma­lary­nyń oryndalýy boıynsha aldaǵy kezeńge arnalǵan basym baǵyttardy aıqyndady.

Temirjol salasynda iri ınfra­qurylymdyq jobalar júzege asyryldy. Atap aıtqanda, Dos­tyq – Moıynty ýchaskesi men Alma­ty stansasynyń aınalma temir­jol jelisi iske qosyldy, 1,5 myń shaqyrymnan astam jol jańartyldy, shamamen 320 mln tonna júk tasymaldandy.

Avtomobıl joldary salasynda 13 myń shaqyrymǵa jýyq jolda qurylys jáne jóndeý ju­mys­­tary júrgizildi. Qyzylor­da – Jez­­qazǵan (Qyzylorda obly­sy aý­maǵyndaǵy), Qalbataý – Maıqapshaǵaı, Uzynaǵash – Otar jobalary aıaqtaldy.

Azamattyq avıasııa salasynda ushý qaýipsizdigi boıynsha IKAO standarttaryna sáıkestik deńgeıi 95,7%-ǵa jetti. Elimizdegi áýejaılar 30 mln-nan astam jolaýshyǵa qyzmet kórsetti, halyqaralyq marshrýttar jelisi keńeıtilip jatyr.

Bıylǵa arnalǵan josparlar aıasynda temirjol salasynda «Dar­baza – Maqtaaral», «Moıynty – Qyzyljar» jelileriniń qury­lysy, «Altynkól – Jetigen», «Beı­neý – Mańǵystaý» ýchaskelerin jańǵyrtý jumysyn aıaqtaý, sondaı-aq «Baq­ty – Aıagóz» jobasyn jalǵastyrý kózdelgen. Budan bólek, vokzaldardy jańǵyrtý jumysyn aıaqtaý, jolaýshylar men júk vagondary parkin odan ári jańartý josparlanyp otyr.

Avtojol salasynda jalpy uzyndyǵy 11 myń shaqyrymdy qam­tıtyn jol qurylysy men rekonstrýksııalaý jumystary jal­ǵasady. Atap aıtqanda, «Qy­zyl­or­da – Jezqazǵan» avtojolynda (Ulytaý oblysy aýmaǵynda) jumys júrgiziledi. «Ortalyq – Batys» jobasyn júzege asyrý­dyń belsendi kezeńi bastalady. Sonymen qatar «Qaraǵandy – Jez­qazǵan», «Aqtóbe – Qyzyl­orda», «Beıneý – Sekseýil» joba­laryn bastaý jos­parlanǵan.

Mýltımodaldy tasymaldy damytý maqsatynda Aqtaý men Qu­ryq porttarynyń ınfra­qury­lymyn jańǵyrtý, onyń ishinde aılaqtardy rekonstrýksııalaý,  túbin tereńdetý jumysyn aıaqtaý kózdelgen.

Áýe habtary men avıasııalyq ınfraqurylymdy damytý aıasynda Astana men Shymkentte ekinshi ushý-qoný jolaqtaryn salý, Almaty áýejaıynyń ishki reıs­ter termınalyn jáne Aqtaý áýe­jaıynyń perronyn rekons­trýk­sııalaý, Atyraý qalasynda jańa termınal salý, Pavlodar áýeaı­laǵyn jańǵyrtý, Arqalyq áýe­jaıyn qalpyna keltirý, son­daı-aq Katon-Qaraǵaı, Zaısan, Kendirli kýrorttyq aımaqtaryndaǵy áýe­jaılar qurylysyn aıaqtaý jos­parlanyp otyr.

Jyl sońyna deıin otandyq áýe kompanııalary 9 jańa áýe kemesin satyp alyp, áýe parkiniń sanyn shamamen 118 birlikke deıin ulǵaıtýdy maqsat etti. Bul jolaýshylar tasymaly syıymdylyǵyn arttyrýǵa, jańa halyqaralyq baǵyttardy ashýǵa, reıster jıiligin kóbeıtýge jol ashady.

Alqa otyrysynyń qorytyndy­synda Roman Sklıar kólik-logıstıka salasyn odan ári damytý boıynsha qosymsha mindetterdi aıqyndap, naqty tapsyrma berdi.