Keıingi kezderi Aýǵanstandaǵy Talıban úkimeti men Pákistan arasyndaǵy qarym-qatynas kúrt shıelenise túsken. О́tken aptada eki el shekarasyndaǵy qarýly qaqtyǵysta ondaǵan adam qaza tapty. Qaqtyǵys munymen bitpeı, talıbandar Pákistannyń áskerı shepterine shabýyl jasady. Buǵan jaýap qaıtarǵan Pákistan Kabýl, Qandaǵar men Paktııa provınsııalaryna oq jaýdyrdy.
Aýǵanstan Pákistannyń ıadrolyq nysanyna soqqy jasady. Osydan soń Pákistan bıligi talıbandarmen shıelenis «ashyq soǵysqa» ulasqanyn málimdedi. Aqparat mınıstri Attaýlla Tarar X arnasynda Pákistan armııasynyń Kabýl, Paktııa men Qandaǵar provınsııalaryndaǵy nysandarǵa soqqy bergenin rastady. Aýǵan úkimeti munyń saldarynan áıelder men balalardy qosa alǵanda, 18 adam qaza tapty dep málimdedi.
«Bizdiń kúshterimiz kez kelgen agressıvti ambısııalardy joıa alady. Búkil ult Pákistan qarýly kúshterimen ıyq tirese jumys isteıdi», dep málimdedi Pákistan premer-mınıstri Shehbaz Sharıf.
Al Aýǵanstan Pákistannyń áskerı shepterine shabýyldaǵan soń, 55 pákistandyq sarbaz qaza tapqanyn, sondaı-aq 19 áskerı bekinisti basyp alǵanyn málimdedi. Alaıda Islamabad Kabýldyń bul málimdemesi shyndyqqa janaspaıtynyn aıtyp, eki jaýyngerdiń qaza tapqanyn resmı málimdedi. Budan soń Kabýl, Qandaǵar men Paktııa provınsııalary oqtyń astynda qalyp, Islamabad 133 áskerı qaza tapqanyn habarlady. Bul málimetti talıbandar da jalǵan dep, 8 sarbaz qaza tapqanyn aıtty.
Aýǵanstan men Pákistan arasyndaǵy qaqtyǵystyń shıelenisýine ótken jyldyń kúzinde Kabýlda eki jarylys bolyp, oǵan Talıban Islamabadty kinálaýy sebep boldy. Sodan keıin Aýǵanstan kúshteri shekara beketinde Pákistan áskerlerine oq jaýdyrdy. Jaýap retinde Pákistan armııasy aýyr artıllerııamen, tanktermen, drondarmen, joıǵysh ushaqtarmen shabýyl jasady.
Qaqtyǵys 2025 jyldyń qazan aıynyń sońyna deıin jalǵasty. Sol kezde Túrkııa men Qatar araǵaıyndylyq jasap, Dohada ótken kelissózderde atysty toqtatýǵa kelisti. Alaıda bul kelissózder beıbitshilik kelisimine qol jetkize almady.
BUU Bas hatshysy jaǵdaıdyń ýshyǵýyna baılanysty alańdaýshylyq bildirdi. Antonıý Gýterrısh eki eldi qaqtyǵysty dereý toqtatýǵa shaqyryp, kez kelgen kelispeýshilikti dıplomatııalyq jolmen sheshýge úndedi.
Elimizdiń Syrtqy ister mınıstrligi Pákistan men Aýǵanstan arasyndaǵy soqqylardan keıin qaza tapqandar men zardap shekkenderdiń arasynda Qazaqstan azamattary joq ekenin málimdedi. SIM taratqan aqparatqa sáıkes, janjalǵa baılanysty konsýldyq mekemelerge ótinish túspegen.
«SIM jaǵdaıdy qadaǵalaýdy jalǵastyrady jáne qajet bolǵan jaǵdaıda konsýldyq-quqyqtyq kómek kórsetedi, sondaı-aq oqıǵanyń órshýine qaraı qosymsha aqparat beredi», delingen vedomstvo málimdemesinde.
Jalpy, Aýǵanstan men Pákistan arasyndaǵy shıelenis HH ǵasyrdyń ortasynda bastaldy. Eki eldiń shekara aımaǵy 1947 jyly Pákistan Ulybrıtanııadan táýelsizdik alǵannan beri qaqtyǵys aımaǵy bolyp qala berdi. Pákistannyń úndi ıelikteri men Aýǵanstan memleketi arasyndaǵy shekara 1893 jyly Ekinshi aǵylshyn-aýǵan soǵysynan (1878–1881) keıin anyqtalǵan Dıýrand syzyǵy boıynsha belgilendi. Alaıda Aýǵanstan bıligi bul shekarany moıyndaýdan bas tartyp, el parlamenti 1949 jyly ony belgileıtin kelisimderdi jaramsyz dep tanydy. Osydan bastap eki el bul daýdyń túıinin tappaı keledi. Osylaısha, jer daýy qara halyqtyń bas qaıǵysyna aınaldy.