Taıaý Shyǵystaǵy ahýal kúrt shıelenisti. AQSh prezıdenti Iranǵa qarsy áskerı operasııanyń kúsheıe túsetinin málimdep, óńirdegi jaǵdaıdyń kútpegen baǵytta órbigenin aıtty. Onyń sózinshe, eń úlken tosyn jaıt – Irannyń arab elderine jasaǵan shabýyldary, dep jazady Egemen.kz.
Donald Tramp CNN telearnasyna bergen suhbatynda amerıkalyq ásker Iranǵa joıqyn soqqy jasap jatqanyn, alaıda negizgi kezeń áli bastalmaǵanyn jetkizdi.
«Biz olardy tas-talqan etip jatyrmyz. Menińshe, bári óte jaqsy júrip jatyr. Bul óte qýatty áreket. Bizdiń armııa – álemdegi eń myqty armııa, jáne biz ony paıdalanyp otyrmyz. <...> Biz olarǵa áli shyn máninde kúshti soqqy jasaǵan joqpyz. Úlken tolqyn áli alda. Al úlken tolqyn jaqyn arada keledi», dedi Tramp CNN júrgizýshisi Djeık Tapperge bergen suhbatynda.
Prezıdenttiń aıtýynsha, ózi úshin «eń úlken tosynsyı» Irannyń óńirdegi arab memleketterine jasaǵan shabýyldary bolǵan. Atap aıtqanda, Bahreın, Iordanııa, Kýveıt, Qatar jáne Birikken Arab Ámirlikteri ataldy.
Tramp Iranǵa qarsy operasııa merzimin atady
Aq úı basshysy komandasynyń Tegeranmen kelissóz júrgizýge tyrysqanyn, alaıda mámilege kele almaǵanyn málimdedi. Onyń sózinshe, Iran ýrandy baıytýdy toqtatýǵa kelispegen. Árbir jańa usynys aldyńǵy kelisimderden bas tartýmen aıaqtalǵan.
New York Post basylymyna bergen suhbatynda Tramp qajet bolǵan jaǵdaıda Iran aýmaǵyna amerıkalyq ásker jiberý múmkindigin de joqqa shyǵarmady.
«Qurlyqtaǵy ásker engizýge qatysty mende eshqandaı alańdaýshylyq joq. Kóptegen prezıdentter: «Qurlyqtaǵy ásker bolmaıdy» dep aıtady. Men olaı demeımin. Men: «Múmkin, qajet bolmas nemese eger qajet bolsa" deımin», dedi Donald Tramp.
Buǵan deıin ol Iranǵa qarsy shabýyl shamamen tórt aptaǵa sozylýy múmkin ekenin aıtqan edi. Keıin operasııa josparlanǵan merzimnen de uzaqqa sozylýy yqtımal ekenin meńzedi.
Iran Netanıahýdyń keńsesine soqqy jasady
Búgin Tramp qaza tapqan tórt amerıkalyq sarbazdy Qurmet medalimen marapattaý rásimin ótkizedi. AQSh-tyń Ortalyq qolbasshylyǵy birlesken amerıkalyq-ızraıldik shabýyl kezinde áskerı qyzmetshilerdiń qaza bolǵanyn rastaǵan.
28 aqpanda Tramp Irannyń joǵarǵy kóshbasshysy aıatolla Álı Hameneı qaza tapqanyn málimdedi. Keıin bul aqparatty Iran tarapy rastady.
Iran Aıatolla Hameneıdiń qazasyn rastady: elde 40 kúndik aza tutý jarııalandy
Taıaý Shyǵystaǵy ahýal osylaısha jańa kezeńge ótti. Vashıngton qatań áskerı ssenarııden bas tartpaıtynyn ańǵartsa, óńir elderi geosaıası tepe-teńdiktiń buzylý qaýpin jiti baqylap otyr.