Otandastarymyz mingen avtobýs evakýasııalaý úshin Dýbaı qalasynan Omanǵa jolǵa shyqty. Bul týraly Syrtqy ister mınıstriniń orynbasary Álibek Baqaev habarlady, dep jazady Egemen.kz.
28 aqpan men 2 naýryz aralyǵynda bılet satyp alǵanmen elge jete almaǵan jerlesterimiz búgin Astana jáne Almaty áýejaıyna kelip qondy. Al bılet almaǵan otandastarymyz ben tranzıttik aımaqta júrgen jáne BAÁ men Qatar aýmaǵynda turatyn Qazaqstan azamattary eki kórshi memleket arqyly elge qaıtarylady.
Dýbaıdaǵy eki áýejaıdyń jumysy qaıta jandanady
«Búgin Dýbaıdan azamattarymyz mingen alǵashqy avtobýs legi shyqty. Kún sońyna deıin 467 azamatty elge jetkizýdi josparlap otyrmyz. Ekinshi reıs Qatardan Saýd Arabııasy baǵytynda uıymdastyrylyp jatyr. Boljam boıynsha, bul – Jıdda qalasy bolady. Adamdardy avtobýspen Qatardan Er-Rııadqa, odan keıin Jıddaǵa jetkizip, ári qaraı otandyq áýe kompanııalarynyń ushaqtarymen Qazaqstanǵa qaıtaramyz», dedi Álibek Baqaev.
Sondaı-aq erteń, 4 naýryz kúni Jıddadan 343 adamdy elge jetkizý josparlanǵan. Evakýasııalaýǵa eń aldymen, kámeletke tolmaǵan balalary bar áıelder, 60 jastan asqan azamattar jáne belgili bir aýrýlary bar adamdardan jasaqtalyp jatyr.
Dýbaıdaǵy ahýal: Otandastarymyz elge qaıta almaı otyr
Qazir azamattarymyzdy elge qaıtarý úshin alty ushaq daıyndalyp jatyr.
«Esepti Syrtqy ister mınıstrliginiń konsýldyq qyzmeti júrgizedi. Jolaýshylar sany shamamen bes myńǵa jýyq. Dese de bul kórsetkish únemi ózgerip otyrady. Air Astana jáne SCAT Airlines tarapynan alty áýe kemesi bólindi. Eger áýe keńistigi ashylsa, birden sol baǵytqa jiberemiz», dedi Kólik mınıstri Nurlan Saýranbaev.