Senatta Halyqaralyq áıelder kúnine arnalǵan saltanatty is-shara ótti. Basqosýda palata tóraǵasy Máýlen Áshimbaev áriptesterin quttyqtap, olarǵa elimizdiń ósip-órkendeýine qosqan jasampaz úlesi men joǵary kásibı biliktiligi úshin berilgen memlekettik nagradalardy tapsyrdy.
M.Áshimbaev áıelderdiń memlekettilikti nyǵaıtý men eldiń damýyna qosqan eleýli úlesin erekshe atap ótti. Sondaı-aq ol qazirgi kezde áıelderdiń róli otbasymen ǵana shektelmeıtinin, olar eldegi qoǵamdyq-saıası úderisterdiń mańyzdy qozǵaýshy kúshine aınalǵanyn aıtty. Senat tóraǵasy mundaı ózgerister Memleket basshysynyń bastamasymen júzege asyrylyp jatqan aýqymdy reformalar men júıeli qoldaýdyń naqty nátıjesi ekenin de jetkizdi.
«Prezıdent Qasym-Jomart Toqaevtyń bastamasymen keıingi jyldarda elimizde aýqymdy jańǵyrtýlar júzege asyrylyp keledi. Sol ózgeristerdiń dáıekti jalǵasy retinde konstıtýsııalyq reforma qolǵa alyndy. Bul sheshim elimiz úshin tarıhı qadam boldy. Konstıtýsııalyq reformanyń strategııalyq maqsaty – Ádiletti, demokratııalyq, áleýmettik, ınnovasııalyq jáne progressıvti Qazaqstan qurý. Osy rette otbasy ınstıtýtyn nyǵaıtýǵa, ulttyq qundylyqtardy qorǵap, dáripteýge, aǵa býynǵa qamqorlyq kórsetýge baǵyttalǵan jańa konstıtýsııalyq normalardyń mańyzy aıryqsha zor. Jańa Konstıtýsııa jobasy áıelderdiń quqyqtary men múmkindikterin keńeıtý, olardyń qoǵamdyq, kásibı, saıası ómirge belsendi qatysýyna jol ashý, sondaı-aq óz áleýetin jan-jaqty júzege asyrýyna jaǵdaı jasaý turǵysynan da erekshe mánge ıe», dedi M.Áshimbaev.
Sonymen qatar ol mereke qarsańynda Memleket basshysynyń Jarlyǵymen Senat tóraǵasynyń orynbasary Olga Perepechınaǵa «Qazaqstannyń eńbek sińirgen qaıratkeri» qurmetti ataǵy berilgenin, al senator Aınur Arǵynbekova «Qurmet» ordenimen marapattalǵanyn atap ótti.
Memlekettik jáne qoǵamdyq qyzmettegi eńbegi, eldiń áleýmettik-ekonomıkalyq jáne mádenı damýyna qosqan eleýli úlesi úshin senator Ásem Rahmetova men Senat apparatynyń bólim meńgerýshisi Aıgúl Bıbolova da «Qurmet» ordenimen nagradtaldy. Sondaı-aq apparat qyzmetkeri Elena Berdnıkovıch, Baıan Oljabaeva, Gúlsim Iskakova men Perızat Saparbekovaǵa «Eren eńbegi úshin» medali tabys etildi.
M.Áshimbaev marapat ıelerin quttyqtaı kele, memlekettik nagradalar elimizdiń damýyna áıelderdiń qosqan aıryqsha úlesiniń jarqyn kórinisi ekenin atap ótti. Ol depýtattardyń kásibı biliktiligi men Senat apparaty qyzmetkerleriniń júıeli ári jaýapty jumysynyń nátıjesinde palatanyń qyzmeti turaqty ári tıimdi júrgizilip otyrǵanyn aıtty. Palata tóraǵasy áriptesterine óz isine adaldyqtyń ozyq úlgisin kórsetip kele jatqany úshin alǵys bildirip, zor densaýlyq, baq-bereke, jańa jeńister men jetistikter tiledi.