Atyraý qalasynyń mańyndaǵy Geolog yqshamaýdanynan buryn joǵalyp ketken Naýryz ben Meıramgúldiń denesi tabyldy. Olar Atyraý oblysynda óltirilgen erli-zaıyptylardyń balalary ekeni anyqtaldy, dep jazady Egemen.kz.
Tergeý derekterine qaraǵanda, Jangeldın aýylynyń turǵyndary – Naýryz ben Meıramgúl biraz ýaqyt buryn habarsyz ketkender tizimine engizilgen. Keıin olardyń denesi kúdikti Sultan Sarsemalıev buryn jubaıy Aqbaıanmen birge jaldap turǵan úıdiń aýlasynan tabyldy.
Keshe Sultan Sársemalıev pen onyń jubaıy Aqbaıan Almatyǵa jetkizilgen. Tergeý barysynda Sultan Sarsemalıev Naýryz ben Meıramgúldi óltirgenin moıyndap, olardyń denesin Geolog yqshamaýdanyndaǵy buryn jaldap turǵan úıdiń aýlasyna kómgenin aıtqan. Osy aqparattan keıin Atyraýdaǵy tergeýshiler atalǵan jerde qaıta qazý jumystaryn júrgizip, máıitterdi tapty.
Qazir Sultan Sársemalıev áıeliniń tórt týysyn óltirdi degen kúdikke ilindi. Buǵan deıin Aqbaıannyń ata-anasynyń denesi óz úıiniń qorasy qulaǵan kezde tabylǵan edi. Al Aqbaıannyń ózi de bastapqyda joǵalǵandar qatarynda bolǵan. Keıin erli-zaıypty Indonezııada ustalǵan soń, ol da kúdikti retinde qarastyrylyp jatyr. Degenmen oǵan naqty qandaı aıyp taǵylǵany ázirge jarııalanǵan joq.
Eske sala keteıik, 29 jastaǵy Sultan Sarsemalıev qos adamdy óltirdi degen kúdikpen halyqaralyq izdeýde júrgen. Ol 24 aqpanda Indonezııadaǵy Senarý aýylyndaǵy qonaqúıde ustaldy. Operasııa Indonezııa polısııasynyń halyqaralyq bólimshesimen birlesip júrgizilgen.
Marqumdardyń otbasy Atyraý oblysyndaǵy Jangeldın aýylynda turǵan. 66 jastaǵy Maqsot Qarabalın men 64 jastaǵy Nasıp О́teshqalıeva úshinshi toptaǵy múgedektigi bar jandar bolǵan, mal sharýashylyǵymen aınalysyp, aýyldan sırek shyǵatyn. Otbasynda eki qyz, bir ul tárbıelengen.
2025 jylǵy 25 jeltoqsanda týystary polısııaǵa otbasynyń joǵalǵany týraly habarlaǵan. Aıtýlarynsha, Maqsot Qarabalın, onyń jubaıy jáne olardyń eki balasy – 32 jastaǵy Naýryz ben 35 jastaǵy Meıramgúl qarasha aıynan beri baılanysqa shyqpaǵan. Keıin otbasynyń úıden belgisiz baǵytta ketip, sol kúıi habarsyz ketkeni belgili bolǵan.