Memleket basshysynyń «Taza Qazaqstan» bastamasy aıasynda Sý resýrstary jáne ırrıgasııa mınıstrligi elimizdiń barlyq óńirinde bulaqtardy tazalaýǵa baǵyttalǵan «Móldir bulaq» ekologııalyq aksııasyn bastady, dep jazady Egemen.kz.
Aýa raıyna baılanysty alǵashqy kezeńde aksııa elimizdiń ońtústik óńirlerindegi 28 bulaqta ótkizildi. Atalǵan bastama ázirge Shymkent qalasy, Almaty, Jambyl, Qyzylorda, Túrkistan jáne Jetisý oblystarynda uıymdastyryldy. Aksııaǵa bir mezgilde shamamen 3,8 myń adam qatysty. Olar bulaqtardyń kózin ashty. Sonymen qatar aınalasyndaǵy aýmaqtar tazartylyp, abattandyryldy, qoqys jınalyp, kóshetter otyrǵyzyldy.
Sý resýrstary jáne ırrıgasııa mınıstri Nurjan Nurjigitov pen Jambyl oblysynyń ákimi Erbol Qarashókeev Jambyl aýdanyndaǵy Jalǵyztal bulaǵyn tazalaý jumystaryna qatysty. Bulaq Aısha bıbi aýylynan 16 shaqyrym jerde ornalasqan.
Sondaı-aq «Móldir bulaq» aksııasy aıasyndaǵy is-sharalar Jambyl oblysynyń Merki, Sarysý, Shý, Talas, Rysqulov, Baızaq jáne Qordaı aýdandaryndaǵy jeti bulaqta ótti. Bulaqtardy tazalaý jumystaryna Sý resýrstary jáne ırrıgasııa mınıstrligi mamandary, «Qazsýshar» RMK oblystyq fılıalynyń, Shý-Talas basseındik ınspeksııasynyń jáne Qazaq sý sharýashylyǵy ǵylymı-zertteý ınstıtýtynyń qyzmetkerleri, sondaı-aq eriktiler men stýdentter qatysty.
Sý resýrstary jáne ırrıgasııa mınıstrliginiń bastamasymen Jambyl oblysynda sý salasyndaǵy alǵashqy eriktiler qozǵalysy – «Bolashaqtyń qaınary» quryldy. Onyń qataryna Taraz qalasyndaǵy Qazaq ulttyq sý sharýashylyǵy jáne ırrıgasııa ýnıversıtetiniń stýdentteri qosyldy. Osyndaı eriktiler toptaryn elimizdiń basqa óńirlerinde de qurý josparlanyp otyr.
Tazarý kúni: Prezıdent azamattardy tazalyq pen tártip estafetasyna belsene qatysýǵa shaqyrdy
«Bolashaqtyń qaınary» qozǵalysy tek ekologııalyq aksııalarǵa qatysýmen shektelmeıdi. Belsendi jastar sý únemdeýdi nasıhattaý jáne qoǵamda ekologııalyq mádenıetti qalyptastyrý baǵytyndaǵy júıeli jumystarǵa atsalysady.
«Búgingi is-sharaǵa eriktiler men stýdentterdiń qatysyp otyrǵany erekshe qýantady. Memleket basshysy eriktiler qozǵalysyna árdaıym erekshe kóńil bólip, olardyń qoǵamdaǵy rólin joǵary baǵalap keledi. Bizdiń mınıstrliktiń bastamasymen elimizde alǵash ret «Bolashaqtyń qaınary» ataýymen sý salasynyń eriktiler toby quryldy. Bul jumystyń Jambyl oblysynan bastalýy Taraz qalasynda Qazaq ulttyq sý sharýashylyǵy jáne ırrıgasııa ýnıversıtetiniń qaıta ashylýymen tikeleı baılanysy. Aldaǵy ýaqytta bul bastama Qazaqstannyń barlyq óńirin qamtıdy», dedi Sý resýrstary jáne ırrıgasııa mınıstri Nurjan Nurjigitov.
Eske salaıyq, byltyr qyrkúıek aıynda «Móldir bulaq» ekologııalyq aksııasy aıasynda Sý resýrstary jáne ırrıgasııa mınıstrligi men vedomstvoǵa qaraıtyn uıymdardyń mamandary elimiz boıynsha bulaqtar men jaǵalaý aýmaqtaryn tazalaý jumystaryn júrgizgen. Is-sharaǵa 4 myńnan astam adam qatysyp, 300 tonnadan astam qoqys jınaldy.
Qazirgi ýaqytta «Qazgıdrogeologııa» ulttyq gıdrogeologııalyq qyzmeti Qazaqstan aýmaǵyndaǵy barlyq bulaqty túgendeý jumystaryn júrgizýdi bastady. Aldyn ala derekterge sáıkes, búgingi tańda 711 áleýetti bulaq anyqtaldy. Qor jáne muraǵat materıaldary negizinde 2 772 bulaqty qamtıtyn karta jasaqtaldy. Bulaqtar sý resýrstary tapshylyǵy jaǵdaıynda sýmen qamtamasyz etýdiń qosymsha kózi retinde qarastyrylady.