Byltyr «Ertis ormany» tabıǵı rezervatynyń ǵylym, aqparat jáne monıtorıng bólimi júrgizgen dalalyq zertteý nátıjesinde orman aýmaǵynda buryn tirkelmegen 40 qus túri anyqtalǵan. Olardyń ishinde Pavlodar oblysynda alǵash ret tirkelgen túrler de bar.
«Ertis ormany» memlekettik tabıǵı rezervaty – elimizdegi bıoalýantúrliligi joǵary, ǵylymı mańyzy zor aýmaqtardyń biri. Qazir munda qustardyń 90 túri tirkelgen. Onyń ishinde 10 túri elimizdiń Qyzyl kitabyna engen. Sondaı-aq ósimdikterdiń 307 túri men sútqorektilerdiń 21 túri anyqtalǵan.
«Byltyr rezervat mamandary zerttep, anyqtaǵan, buryn-sońdy kezdespegen qus túrleriniń ishinde kádimgi jylanjegish (Circaetus gallicus), ementumsyq (Coccothraustes coccothraustes), azııalyq qarabas shaqshaq (Saxicola maurus), qyzylqulaq sulykesh (Emberiza cioides) syndy qustar bar. Birazy buǵan deıin Ertis-Baıan óńirinde ushyraspaǵan, alǵash tirkelip otyr», dep habarlady rezervat ókilderi.
Mekeme basshylyǵy aldaǵy ýaqytta da monıtorıng jasaýdy júıeli jalǵastyra beretinderin aıtady. Tabıǵı baılyqty saqtaý men qorǵaýda «Ertis ormanynyń» alatyn mańyzy arta túspekshi.
Pavlodar oblysy