Qazaqstan ınvestorlar, bıznes ókilderi jáne ózge de shetel azamattary úshin elge kirý, vıza rásimdeý jáne ruqsat qujattaryn alý tártibin ońtaılandyryp jatyr, dep habarlaıdy Egemen.kz.
Jeńildetilgen jáne ınvestısııalyq rejımder aıasynda túrli preferensııalardyń keń aýqymy usynylǵan. Bul degenimiz – ınvestorlar men kásipkerler arnaıy vızalyq rejımderdi, ótinimderdi jedel qaraý rásimderin, sondaı-aq ınvestısııalyq jobalardy súıemeldeý tetikterin paıdalana alady degen sóz.
Jeńildetilgen sharttar suranysqa ıe mamandyqtar boıynsha Qazaqstanda jumys isteý úshin keletin shetel azamattaryna, sondaı-aq memlekettik organdardyń qoldaýhaty bolǵan jaǵdaıda ekonomıkalyq jáne áleýmettik jobalarǵa qatysýshylarǵa da qoljetimdi.
Qazaqstan azamattary vızasyz bara alatyn elder sany artty
Sıfrlyq tehnologııalardyń qarqyndy damýy jahandyq eńbek naryǵyn túbegeıli ózgertip jatyr. Álemde jasandy ıntellektpen jumys isteý daǵdylary bar mamandarǵa suranys artyp keledi. Osyǵan baılanysty suranysqa ıe mamandyqtar tiziminde erekshe nazar IT salasyna aýdarylǵan (jasandy ıntellekt ınjeneri, aqparattyq júıeler arhıtektory, qosymsha ázirleýshi, aqparattyq qaýipsizdik ınjeneri jáne t.b.). Sonymen qatar densaýlyq saqtaý (neırohırýrg, gematolog, onkolog, sáýlelik dıagnostıka dárigeri jáne t.b.), kreatıvti ındýstrııa (grafıkalyq dızaıner, dybys rejısseri, grafıkalyq anımasııa tehnıgi jáne t.b.), jaratylystaný ǵylymdary, ınjenerlik jáne óńdeý salalarynda da (farmasevtıkalyq óndiris ınjener-tehnology, lazerlik jabdyqtar ınjeneri, bakterıolog jáne t.b.) suranys joǵary.
Mysyr vızasy qymbattady: Qazaqstan azamattary úshin jańa tarıf engizilmek
Eýrazııalyq ekonomıkalyq odaqqa (Armenııa Respýblıkasy, Belarýs Respýblıkasy, Qyrǵyzstan, Reseı Federasııasy) múshe memleketterdiń azamattary úshin de qolaıly jaǵdaılar jasalǵan.
EAEO aıasynda qatysýshy elderdiń azamattary Qazaqstan aýmaǵynda ruqsat qujattaryn almaı-aq erkin jumysqa ornalasý quqyǵyna ıe. Bul jumys kúshiniń joǵary mobıldiligin qamtamasyz etip, ekonomıkalyq yntymaqtastyqtyń damýyna oń áserin tıgizedi. Aıta ketý kerek, dál osyndaı qaǵıdat boıynsha qazaqstandyqtar da odaqqa múshe elderde eńbek etip júr.
Odaqqa múshe emes elderdiń azamattary úshin eńbek naryǵynyń qajettilikteri men kvotalaý negizinde qurylǵan jumys kúshin tartý júıesi qoldanylady. Bul tásil ekonomıka múddeleri men ishki eńbek naryǵyn qorǵaý arasyndaǵy tepe-teńdikti saqtaýǵa múmkindik beredi. Osylaısha Qazaqstan ashyq ári teńgerimdi kóshi-qon saıasatyn qalyptastyryp keledi.
Ulybrıtanııaǵa vıza alý jeńildeýi múmkin
2026 jyldyń basynan beri suranysqa ıe mamandyqtar boıynsha sheteldik jumys kúshin tartýǵa 5,1 myń ruqsat berildi, al eńbek ımmıgranttaryna shamamen 75 myń ruqsat rásimdeldi.
Eńbek jáne halyqty áleýmettik qorǵaý mınıstrligi ishki eńbek naryǵyn qorǵaý maqsatynda jyl saıyn jumys berýshilerdiń suranysyna sáıkes sheteldik jumys kúshin tartý kvotasyn belgilep, bóledi.
2026 jylǵa arnalǵan sheteldik jumys kúshin tartý kvotasy 23,6 myń adamdy quraıdy, al eńbek ımmıgranttaryn tartý kvotasy 221,8 myń adam deńgeıinde aıqyndalǵan.
Sonymen qatar eldiń ornyqty damýyn qamtamasyz etýge jáne Qazaqstanmen óz bolashaǵyn baılanystyratyn, ıaǵnı azamattyq alýǵa nıetti shetel azamattaryn qabyldaý sapasyn arttyrýǵa baǵyttalǵan kóshi-qon saıasaty júıeli túrde jetildirilip jatyr.
Osyǵan baılanysty turaqty turýǵa ruqsat alý tetiginiń zamanaýı sıfrlyq tásilder men ashyqtyq qaǵıdattaryna negizdelgen jańartylǵan tetigi engizilýde.
Jańa tártip úmitkerlerdi kezeń-kezeńimen baǵalaýdy kózdeıdi: memlekettik tildi bazalyq deńgeıde meńgerýin tekserý, saýalnamalyq derekterdi taldaý, sıfrlyq skorıng, ýákiletti memlekettik organdar tarapynan tekserýler, sondaı-aq qorytyndy suhbat.
Bul tetik Qazaqstandy uzaq merzimge qonystanyp, qoǵam ómirine belsendi aralasatyn el retinde tańdaıtyn azamattarǵa baǵyttalǵan.
Atalǵan tásildi iske asyrý turaqty turýǵa nıetti adamdardy neǵurlym dál ári teńgerimdi qabyldaýdy qamtamasyz etip, kóshi-qon úderisteriniń tıimdiligin arttyrýǵa jáne áleýmettik turaqtylyqty nyǵaıtýǵa múmkindik beredi. Jalpy, qabyldanyp jatqan sharalar memleket, qoǵam jáne ekonomıka múddelerine saı keletin ashyq, pragmatıkalyq ári jaýapty kóshi-qon saıasatyn qalyptastyrýǵa baǵyttalǵan.